Rusiyanın xarici işlər naziri Sergey Lavrov oktyabrın 19-da Tehrana işgüzar səfər edərək iranlı həmkarı Abbas Araqçi ilə görüşüb. Danışıqlarda iki ölkə arasında strateji tərəfdaşlığın gücləndirilməsi, Yaxın Şərqdəki hərbi-siyasi vəziyyət və regional təhlükəsizlik məsələləri müzakirə olunub.
MSNews.az xəbər verir ki, bu barədə Rusiya Xarici İşlər Nazirliyi məlumat yayıb.
“Anadolu Agentliyi”nin məlumatına görə, nazirlərin görüşündən sonra Rusiya və İran nümayəndə heyətləri arasında geniş tərkibdə danışıqlar keçirilib.
İranın xarici işlər naziri Abbas Araqçi danışıqları məhsuldar qiymətləndirərək Moskva ilə Tehran arasında siyasi, iqtisadi və ticarət əlaqələrinin genişləndirilməsinin vacibliyini vurğulayıb.
Tərəflər Fars körfəzi, Cənubi Qafqaz, Avropa və Ukraynadakı vəziyyət barədə də fikir mübadiləsi aparıblar.
İranın “Tasnim” agentliyinin məlumatına görə, Araqçi görüşdən sonrakı birgə mətbuat konfransında Rusiya ilə əməkdaşlığın müxtəlif sahələrdə inkişaf etdiyini bildirib.
“Reuters” agentliyinin məlumatına görə, Araqçi boğazdakı təhlükəsizlik problemlərinə görə ABŞ-ni günahlandırıb və mövcud böhranın diplomatik yollarla həllinə çağırıb.
İran diplomatiyasının rəhbəri region ölkələrinin xarici hərbi qüvvələrin iştirakı olmadan ortaq təhlükəsizlik mexanizmi formalaşdırmasının vacibliyini bildirib.
“Mövcud mürəkkəb vəziyyətə baxmayaraq, Rusiya İranla iqtisadi və investisiya sahələrində əldə edilmiş razılaşmalardan imtina etmək niyyətində deyil”, – deyə Lavrov bildirib.
Rusiya naziri Buşehr Atom Elektrik Stansiyasına rusiyalı mütəxəssislərin tədricən qayıtdığını, neft-qaz hasilatı və enerji daşıyıcılarının nəqli sahəsində əməkdaşlığın geniş perspektivlərə malik olduğunu vurğulayıb.
Lavrovun Tehran səfəri Rusiya və İranın regional böhranların diplomatik həlli istiqamətində koordinasiyanı davam etdirdiyini və ikitərəfli strateji əməkdaşlığı genişləndirmək niyyətində olduğunu göstərir.
