Oktyabrın 15-də Bakıda Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) VII Zirvə Görüşü keçirilib. Azərbaycan Prezidenti İlham Əliyev sammitdə çıxış edərək ölkəmizin xarici siyasəti, Ermənistanla münasibətlər, ərazi bütövlüyünün bərpası və beynəlxalq təhlükəsizlik məsələləri barədə mühüm bəyanatlar səsləndirib. Zirvə Görüşündə Laosun təşkilata üzvlüyü haqqında qərar qəbul edilib.
MSNews.az xəbər verir ki, Prezident İlham Əliyev sammitdə iştirak edən dövlət və hökumət başçılarını qarşılayıb, daha sonra tədbiri açıq elan edib.
Dövlətimizin başçısı Azərbaycanın Asiya ilə Avropanın kəsişməsində yerləşdiyini, Avrasiya məkanında siyasi, iqtisadi, nəqliyyat və enerji əməkdaşlığının inkişafında mühüm rol oynadığını vurğulayıb.
Prezident bildirib ki, Azərbaycan bərabərhüquqluluğa, dövlətlərin suverenliyinə, ərazi bütövlüyünə və daxili işlərə qarışmamaq prinsiplərinə əsaslanan müstəqil xarici siyasət yürüdür.
İlham Əliyev: “Sülh hələ də kövrəkdir”
Prezident İlham Əliyev Ermənistanla münasibətlərə toxunaraq Azərbaycanın müharibədən sonra sülh təşəbbüsü ilə çıxış etdiyini bildirib. Dövlətimizin başçısı 2020-ci ildə 44 günlük Vətən müharibəsini və 2023-cü ilin sentyabrında Azərbaycanın öz suverenliyini tam bərpa etməsini xatırladıb.
Prezident beynəlxalq təşkilatların Ermənistan–Azərbaycan münaqişəsinin həlli prosesindəki fəaliyyətini tənqid edib, xüsusilə BMT Təhlükəsizlik Şurasının 1993-cü ildə qəbul etdiyi qətnamələrin uzun müddət icra olunmadığını vurğulayıb.
İlham Əliyev Azərbaycanın hərbi qələbədən sonra Ermənistana sülh təklif etdiyini qeyd edib.
“Biz sülh təklif etdik və bir ildən bir az çoxdur ki, sülh içində yaşayırıq. Bu sülh hələ də kövrəkdir, onu qorumaq və möhkəmləndirmək lazımdır”, – deyə dövlətimizin başçısı bildirib.
Prezident həmçinin beynəlxalq təşkilatların qərar və qətnamələrinin icrasını təmin edən mexanizmlərin hazırlanmasının vacibliyini vurğulayıb.
Laos AQEM-in yeni üzvü oldu
Zirvə Görüşündə təşkilatın genişlənməsi ilə bağlı mühüm qərar da qəbul edilib. Laos Xalq Demokratik Respublikası AQEM-ə yeni üzv dövlət kimi qəbul olunub. Prezident İlham Əliyev bu qərarı təşkilatın Asiyada daha geniş dialoq platformasına çevrilməsi baxımından əhəmiyyətli hadisə adlandırıb. Dövlətimizin başçısı Laos Prezidenti Thonqlun Sisuliti üzvlük münasibətilə təbrik edib. Laosun təşkilata üzvlüyünün Azərbaycanın sədrliyi dövründə reallaşması xüsusi qeyd olunub.
Azərbaycanın AQEM-ə sədrliyi 2028-ci ilə qədər davam edəcək
Prezident İlham Əliyev Azərbaycanın təşkilata sədrliyi dövründə nəqliyyat, rəqəmsallaşma, ətraf mühitin mühafizəsi, turizm, təhsil və elm sahələrində əməkdaşlığın inkişafına xüsusi diqqət yetirildiyini bildirib.
Dövlətimizin başçısı Azərbaycanın AQEM-ə sədrliyinin daha iki il uzadılmasına göstərilən dəstəyə görə üzv ölkələrə təşəkkür edib. Sammit iştirakçıları Azərbaycanın 2026–2028-ci illərdə də təşkilata sədrliyini davam etdirməsini yüksək qiymətləndiriblər.
Özbəkistan Prezidenti Şavkat Mirziyoyev Azərbaycan nümayəndəsinin AQEM-in Baş katibi vəzifəsinə namizədliyini də dəstəklədiyini açıqlayıb.
Orta Dəhliz, yaşıl enerji və beynəlxalq əməkdaşlıq
Zirvə Görüşündə çıxış edən Qazaxıstan Prezidenti Kasım-Jomart Tokayev Azərbaycanla birgə həyata keçirilən Trans-Xəzər fiber-optik rabitə xəttindən danışıb. O, layihənin Avrasiyada daha sürətli və təhlükəsiz məlumat ötürülməsinə imkan yaradacağını bildirib.
Tokayev həmçinin Azərbaycan, Qazaxıstan və Özbəkistan arasında yaşıl enerji sahəsində əməkdaşlığın inkişafını yüksək qiymətləndirib. Qazaxıstan Prezidenti Bakı–Tbilisi–Ceyhan boru kəməri vasitəsilə Qazaxıstan neftinin nəqlinin artırılmasının nəzərdə tutulduğunu da açıqlayıb.
Laos Prezidenti Thonqlun Sisulit isə ölkəsinin dəmir yolu şəbəkəsinin Mərkəzi Asiya və Azərbaycan istiqamətində genişləndirilməsində maraqlı olduğunu bildirib.
Çinin xarici işlər naziri Vanq Yi Azərbaycanın yaşıl enerji və iqlim dayanıqlılığı istiqamətində fəaliyyətini yüksək qiymətləndirərək ölkəsinin Azərbaycanın AQEM-ə sədrliyinin davam etməsini dəstəklədiyini vurğulayıb.
Bakı Bəyannaməsi qəbul olunub
Sammitdə AQEM çərçivəsində əməkdaşlığın inkişafına dair sənədlər də qəbul edilib.
Təqdim olunan məlumata əsasən, VII Zirvə Görüşündə Bakı Bəyannaməsi, həmçinin sağlamlıq və əməyin təhlükəsizliyi sahəsində əməkdaşlığa dair bəyanat qəbul olunub. Sənədlərdə beynəlxalq hüquq, suveren bərabərlik, ərazi bütövlüyü, mübahisələrin sülh yolu ilə həlli və çoxtərəfli əməkdaşlıq prinsiplərinə diqqət yetirilib.
