Belarus Prezidenti Aleksandr Lukaşenko ölkəsinin mümkün müharibəyə hazırlaşdığını və ən mənfi təhlükəsizlik ssenarilərinə qarşı hazırlıqlı olmasının vacibliyini bəyan edib. O, bununla yanaşı, Belarusun heç bir ölkəyə hücum etmək niyyətində olmadığını vurğulayıb.
MSNews.az xəbər verir ki, Lukaşenko bu barədə oktyabrın 13-də ölkənin güc strukturlarının rəhbərləri ilə keçirilən müşavirədə danışıb. Onun açıqlamalarını Belarusun BELTA dövlət informasiya agentliyinə istinadən “İnterfaks” yayıb.
Belarus lideri bildirib ki, mövcud beynəlxalq vəziyyətdə ölkənin bütün hərbi və təhlükəsizlik qurumları ən pis ehtimallara hazır olmalıdır.
“Biz özümüz üçün ən mənfi ssenariyə hazır olmalıyıq. Bu ssenarilər hesablanıb və bizə məlumdur. Lakin yeni təcavüz dalğasına yol vermək olmaz. Bu gün heç kimə belə bir vəziyyət lazım deyil”, – deyə Lukaşenko vurğulayıb.
O, Polşa və Baltikyanı ölkələrin hərbi imkanlarına da toxunaraq bu dövlətlərin öz hərbi məqsədlərini həyata keçirmək üçün kifayət qədər gücə malik olmadığını iddia edib.
“Biz müharibədən yayınmaq üçün müharibəyə hazırlaşırıq. Heç kimə hücum etmək niyyətində deyilik”, – deyə Belarus Prezidenti bildirib.
Onun sözlərinə görə, Belarus Silahlı Qüvvələrində intensiv yoxlamaların keçirilməsi qonşu dövlətlərə qarşı hücum hazırlığı kimi qiymətləndirilməməlidir.
Belarus lideri mümkün müharibə şəraitində yalnız ordunun deyil, bütün dövlət strukturlarının koordinasiyalı fəaliyyət göstərməsinin vacibliyini vurğulayıb.
Müşavirə Daxili İşlər Nazirliyinin daxili qoşunlarına məxsus 7-ci xüsusi milis briqadasının döyüş və səfərbərlik hazırlığının yoxlanılmasının nəticələrinə həsr olunub. Bu barədə “Fontanka” məlumat yayıb.
