Türkiyənin hakim Ədalət və İnkişaf Partiyasının (AK Parti) Bursa millət vəkili Muhammet Müfit Aydın Azərbaycanla bağlı ona aid edilən açıqlamalar fonunda diqqət mərkəzinə düşüb. Siyasətçi daha əvvəl İstanbulun sabiq Böyükşəhər Bələdiyyəsi sədri Əkrəm İmamoğlunun montaj edilmiş fotosunu paylaşması və təhqiramiz ifadələr işlətməsi ilə gündəmə gəlib.
MSNews.az xəbər verir ki, 1954-cü ildə Türkiyənin Ağrı vilayətində anadan olan Muhammet Müfit Aydın uzun illər dövlət idarəçiliyində çalışıb. O, Anadolu Universitetinin biznesin idarə edilməsi ixtisasını bitirib, Sakarya və Bursa vilayətlərində müxtəlif inzibati vəzifələr tutub.
Türkiyə Böyük Millət Məclisinin rəsmi məlumatına əsasən, Aydın parlamentin 26, 27 və 28-ci çağırışlarında Bursa vilayətindən deputat seçilib. Hazırda parlamentin Ətraf Mühit Komissiyasının sədr müavinidir.
Aydın 2021-ci il iyulun 31-də sosial şəbəkə hesabında Əkrəm İmamoğlunun montaj edilmiş fotosunu paylaşaraq geniş tənqidlərə səbəb olub.
Türkiyənin “Cumhuriyet” qəzetinin həmin tarixli məlumatına görə, deputat İmamoğlunu İstanbulda daşqınların baş verdiyi vaxt istirahətdə olmaqda ittiham edən paylaşım edib.
Paylaşımda “ZilletinOçocuklarıYaktı” həştəqindən istifadə olunub. Bu ifadə sosial şəbəkələrdə təhqiramiz məzmununa görə tənqid edilib.
Məlum olub ki, İmamoğlunun istirahətdə olduğunu göstərmək üçün istifadə edilən foto montaj edilib. Deputat isə yaranan reaksiyalardan sonra paylaşımını silib. Hadisə barədə “Gerçek Gündem” də məlumat yayıb.
2026-cı ilin oktyabrında Aydının Azərbaycanın məktəblərdə vahid geyim qaydaları ilə bağlı siyasətini tənqid etdiyi və ölkənin Türkiyədən 25 il geri qaldığını söylədiyi iddia olunur.
