Amerikalı milyarder və sahibkar İlon Mask ABŞ Prezidenti Donald Trampın Ukraynada siyasi rəhbərliyin dəyişməsi ilə bağlı çağırışına dəstək verib. O, Ukraynanın yeni lider seçməsinin vaxtının çatdığını bildirib.
MSNews.az xəbər verir ki, “Deutsche Welle” nəşrinin məlumatına görə, Mask oktyabrın 11-də “X” sosial şəbəkəsində Trampın Ukrayna Prezidenti Volodimir Zelenski ilə bağlı açıqlamasının yayımlandığı paylaşıma münasibət bildirib.
“Razıyam, Ukraynanın yeni lider tapmasının vaxtı çatıb”, – deyə milyarder yazıb.
Mask bundan bir gün əvvəl də Trampın Ukraynanın Rusiya neft emalı zavodlarına endirdiyi zərbələrlə bağlı tənqidlərinə qoşularaq Zelenskinin “həddini çox aşdığını” bildirmişdi.
ABŞ Prezidenti Donald Tramp oktyabrın 10-da jurnalistlərə açıqlamasında Zelenskinin Rusiya ilə müharibəni başa çatdırmaq imkanlarından istifadə etmədiyini iddia edib. O, Ukraynaya Moskva ilə razılıq əldə edə biləcək yeni prezident lazım olduğunu söyləyib.
“Associated Press” agentliyinin məlumatına görə, Trampın bu bəyanatı Rusiya Prezidenti Vladimir Putinlə dizel yanacağının tədarükünə dair razılaşma əldə olunmasından sonra səsləndirilib.
ABŞ lideri Ukraynanın Rusiya neft emalı zavodlarına hücumlarını da tənqid edərək bu zərbələrin qlobal yanacaq qiymətlərinə mənfi təsir göstərdiyini iddia edib.
Zelenski isə Trampın çağırışına cavab verərək Ukrayna prezidentini seçmək hüququnun yalnız ölkə xalqına məxsus olduğunu vurğulayıb. O, Rusiya 60 günlük atəşkəsə razılaşarsa, prezident seçkilərinin təşkilinə hazır olduğunu bildirib.
Qeyd edək ki, Maskın “SpaceX” şirkətinə məxsus Starlink peyk internet sistemi Ukraynanın rabitə infrastrukturunda mühüm rol oynayır. Buna baxmayaraq, milyarderin son açıqlamaları onun Zelenski ilə siyasi fikir ayrılıqlarını yenidən gündəmə gətirib.
