ABŞ nümayəndələrinin Ukraynaya Rusiyanın neft emalı zavodlarına hücumları dayandırmadığı halda kəşfiyyat məlumatlarının paylaşılmasının kəsilə biləcəyini bildirdiyi iddia olunur. Vaşinqton tərəfi isə belə bir təhdidin səsləndirildiyini təkzib edir.
MSNews.az xəbər verir ki, “Axios” ukraynalı rəsminin sözlərinə istinadən yazıb ki, Stiv Uitkoff və Cared Kuşner Miami görüşlərində Ukrayna nümayəndə heyətinə Prezident Donald Trampın neft emalı zavodlarına zərbələrə görə narazı olduğunu çatdırıblar.
Ukrayna rəsmisinin versiyasına görə, ABŞ nümayəndələri hücumlar davam edərsə, Kiyevin ABŞ kəşfiyyat məlumatlarına çıxışının məhdudlaşdırıla biləcəyini bildiriblər.
Lakin ABŞ rəsmisi “Axios”-a deyib ki, heç bir ultimatum və ya təhdid olmayıb. Onun sözlərinə görə, Ukraynaya sadəcə xatırladılıb ki, ABŞ silah və kəşfiyyat məlumatı verən etibarlı tərəfdaşdır və Kiyev amerikalı istehlakçılara zərər verən addımlardan çəkinməlidir.
ABŞ tərəfi Ukraynanın Rusiya neft emalı zavodlarına hücumlarının qlobal yanacaq bazarına da təsir etdiyini düşünür. Vaşinqton bu zərbələrin Rusiya üçün ağrılı olduğunu qəbul etsə də, onların dizel qiymətlərini yüksəltməklə ABŞ-a da mənfi təsir etdiyini bildirir.
Məsələ Donald Trampın Vladimir Putinlə Rusiya dizelinin dünya bazarına çıxarılması barədə razılaşma əldə etməsindən dərhal sonra gündəmə gəlib. “Axios” yazır ki, bu qərar Kiyevdə ciddi narazılıq yaradıb.
Danışıqlarda təkcə enerji məsələsi deyil, müharibənin dayandırılması üçün yeni təkliflər, təhlükəsizlik zəmanətləri və mümkün ərazi məsələləri də müzakirə olunub. “Axios” daha əvvəl bildirmişdi ki, Vaşinqton enerji infrastrukturu və taxıl daşımalarına hücumların dayandırılmasını nəzərdə tutan qismən atəşkəs ideyasını da müzakirəyə çıxarıb.
Rusiya Prezidenti Vladimir Putinin müharibəni bitirməyə hazır olması barədə isə ehtiyatlı olmaq lazımdır. Kremlin öz açıqlamalarından görünür ki, Putin Tramp ilə danışıqlarda müharibənin həlli mövzusunu müzakirə edib, lakin döyüşləri dayandırmağa razılıq verdiyini açıqlamayıb. “Axios” yazır ki, Putin hələlik danışıqları bərpa etmək barədə konkret öhdəlik götürməyib.
