Səudiyyəli ilahiyyatçı Süleyman ər-Ruheyli Qəzzada müharibənin başladığı 2023-cü ilin oktyabrında Quba məscidində etdiyi xütbədə müsəlman rəhbərlərə itaətsizlik çağırışlarını pisləyib və hökmdarın icazəsi olmadan başqa ölkəyə döyüşmək üçün getməyin caiz olmadığını bildirib.
MSNews.az xəbər verir ki, sözügedən çıxış sosial şəbəkələrdə müxtəlif tarixlərdə yenidən yayılıb. Fələstinli “Kashif” faktçek platforması videonu araşdıraraq onun montaj olmadığını, lakin yeni yox, 21 oktyabr 2023-cü ildə ər-Ruheylinin rəsmi “YouTube” kanalında yayımlanmış xütbədən götürüldüyünü müəyyən edib.
Xütbədə ər-Ruheyli Fələstində baş verənlərə görə müsəlmanların hisslərindən istifadə edilərək rəhbərlərə qarşı itaətsizliyə çağırılmasını tənqid edib. O, belə çağırışların dini qaydalara və “şəriətin məqsədlərinə” zidd olduğunu deyib.
İlahiyyatçı həmçinin xaricdə silahlı döyüşə qoşulmaq məsələsinə toxunaraq bunun fərdi qərarla edilməməli olduğunu bildirib. Onun mövqeyinə görə, belə addım yalnız hökmdarın rəhbərliyi və icazəsi çərçivəsində ola bilər.
Ər-Ruheyli çıxışında dövlətlərin beynəlxalq müqavilə və razılaşmalarına da işarə edib və vətəndaşların rəhbərlik həmin öhdəliklərin bitdiyini elan edənədək onlara əməl etməli olduğunu müdafiə edib. Bu yanaşma onun rəhbərliyə itaəti ön plana çıxaran dini mövqeyi ilə səsləşir.
