Azərbaycan Prezidenti İlham Əliyev oktyabrın 9-da Türkmənistanın Türkmənbaşı şəhərində keçirilən MDB Dövlət Başçıları Şurasının iclasında iştirak etmək üçün “Avaza” Kompleksinə gəlib.
MSNews.az xəbər verir ki, Azərbaycan Prezidentini kompleksdə Türkmənistan Prezidenti Sərdar Berdiməhəmmədov qarşılayıb.
Qarşılanma mərasimindən sonra İlham Əliyev və MDB Dövlət Başçıları Şurasının iclasında iştirak edən digər dövlət və hökumət başçıları birgə foto çəkdiriblər.
Türkmənistan 2026-cı ildə Müstəqil Dövlətlər Birliyinə sədrlik edir. Türkmənbaşı şəhərində keçirilən sammit çərçivəsində MDB ölkələri arasında əməkdaşlığın aktual məsələlərinin və regional gündəliyin müzakirəsi nəzərdə tutulur.
Prezident İlham Əliyevin Türkmənistana səfəri çərçivəsində bir gün əvvəl Azərbaycan və Mərkəzi Asiya dövlət başçılarının 8-ci Məşvərət görüşü də keçirilib. Azərbaycan lideri həmin tədbirdə çıxış edib və regional nəqliyyat, enerji, ticarət və investisiya əməkdaşlığının genişləndirilməsinin əhəmiyyətini vurğulayıb.
