İsraildə oktyabrın 27-də keçiriləcək parlament seçkilərində 7 oktyabr 2023-cü il hücumundan birbaşa zərər çəkmiş ən azı doqquz nəfər müxtəlif partiyaların siyahılarında namizəd kimi yer alıb. Onların arasında həlak olanların yaxınları, girov ailələrinin üzvləri və hücum zamanı sağ qalan şəxslər var.
MSNews.az xəbər verir ki, “Reuters” yazır ki, bu namizədlər müxtəlif siyasi düşərgələri təmsil etsələr də, bir çoxu 7 oktyabr hücumunun qarşısının alınmamasına və girovların azad edilməsi prosesinin uzanmasına görə hökuməti tənqid edir.
Namizədlər arasında oğlunu Kibbutz Be’eridə itirən Mical Hirş Neqri, keçmiş general Noam Tibon, girov götürülən iki qardaşı üçün uzun müddət kampaniya aparan Şaron Şarabi və digər şəxslər var.
Bununla yanaşı, 7 oktyabr qurbanlarının bütün yaxınları müxalifət düşərgəsində deyil. Həlak olmuş polis əməkdaşı Ran Qvilinin anası Talik Qvili Netanyahu tərəfindən “Likud” partiyasının siyahısında 9-cu yerə daxil edilib. O, Netanyahu hökumətini və onun təhlükəsizlik siyasətini müdafiə edən namizədlərdən biridir.
“AP” qeyd edir ki, 7 oktyabr hadisəsi seçki kampaniyasının əsas mövzularından birinə çevrilib. Müxalifət partiyaları hökumətdən təhlükəsizlik uğursuzluqları ilə bağlı müstəqil dövlət araşdırması tələb edir, Netanyahu isə əsas məsuliyyətin hərbi və təhlükəsizlik rəhbərliyində olduğunu bildirir.
“Financial Times” yazır ki, 27 oktyabr seçkiləri Netanyahu üçün 7 oktyabr hücumundan sonra ilk ümumxalq siyasi sınaq olacaq və hücumun nəticələri seçici davranışında mühüm rol oynayır.
2023-cü il oktyabrın 7-də HƏMAS-ın rəhbərlik etdiyi hücum nəticəsində İsraildə təxminən 1 200 nəfər öldürülüb, 251 nəfər girov götürülüb. Hadisə sonrakı illərdə İsrail siyasətinin əsas parçalanma xətlərindən birinə çevrilib.
