Meksikada narkokartellərin yüksək qiymətli dəniz xiyarından bəzi beynəlxalq hesablaşmalarda nağd pulun əvəzi kimi istifadə etdiyi bildirilir. Asiya bazarında delikates sayılan bəzi növlərin qiyməti kiloqram üçün 3 min dollara qədər çata bilir.
MSNews.az xəbər verir ki, “Foreign Policy” yazır ki, dəniz xiyarının yüksək qiyməti və Asiyada ona olan böyük tələbat bu məhsulu qanunsuz ticarət üçün cəlbedici edib. Transmilli mütəşəkkil cinayətkarlıq üzrə ekspert Vanda Felbab-Brauna görə, Çindəki bəzi cinayətkar qruplar beynəlxalq bank sistemindən yayınmaq üçün dəniz xiyarını nağd pul əvəzinə qəbul edirlər.
Nəşr buna nümunə kimi keçmiş ABŞ Sərhəd Patrulu əməkdaşı Sezar Daleo ilə bağlı işi göstərir. İstintaqa görə, Daleo Çinli kimyəvi maddə istehsalçıları ilə Meksika narkokartelləri arasında vasitəçi olub: bir istiqamətdə narkotik istehsalında istifadə olunan prekursor kimyəvi maddələr daşınıb, əvəzində isə ödəniş kimi qorunan dəniz xiyarı növləri göndərilib.
Məhkəmə materiallarına əsasən, Daleo 2014–2016-cı illərdə ən azı 80 dəfə qurudulmuş Isostichopus fuscus növünün ABŞ-a qanunsuz keçirilməsini təşkil edib. Bu əməliyyatların ümumi dəyəri 250 min dollardan çox olub. O, sonradan məhkum edilərək 30 aylıq həbs cəzası alıb.
“Foreign Policy” həmçinin yazır ki, Meksikanın Sinaloa karteli və daha az dərəcədə Xalisko Yeni Nəsil karteli son illərdə dəniz məhsulları sektoruna, o cümlədən dəniz xiyarı ovuna nüfuz edib. Cinayətkar qrupların balıqçılarla alıcılar arasında vasitəçilik etdiyi, rəqiblərə qarşı təhdid və zorakılıqdan istifadə etdiyi bildirilir.
Meksika hökuməti həddindən artıq ovlanma səbəbindən bəzi bölgələrdə dəniz xiyarı ovuna ciddi məhdudiyyətlər tətbiq edib. Buna baxmayaraq, qanunsuz hasilat davam edir. Meksika Baş Prokurorluğu bu ilin iyulunda Manzanillo limanından Honq-Konqa qanunsuz ixrac edilməyə çalışılan 12,1 tondan çox qurudulmuş dəniz xiyarının müsadirəsi ilə bağlı məhkumluq hökmü barədə məlumat yayıb.
Dəniz xiyarları yalnız bahalı qida məhsulu deyil, həm də dəniz ekosistemi üçün mühüm canlılardır. Mütəxəssislər onların həddindən artıq ovlanmasının dəniz dibində ekoloji tarazlığı poza biləcəyi barədə xəbərdarlıq edirlər. Foreign Policy
