Pakistanın həbsdə olan keçmiş baş naziri İmran Xanın minlərlə tərəfdarı onun azadlığa buraxılması tələbi ilə İslamabada doğru uzun yürüşə başlayıb. Aksiya “Pakistan Tehreek-e-Insaf” (PTI) partiyasının hakim olduğu Xayber-Paxtunxva əyalətindən start götürüb.
MSNews.az xəbər verir ki, bu barədə “Reuters” məlumat yayıb. Yürüş bazar günü başlayıb və iştirakçıların bir neçə dayanacaqdan keçərək paytaxt İslamabada çatması planlaşdırılır.
Yürüşə Xayber-Paxtunxvanın baş naziri Sohail Afridi rəhbərlik edir. O, İmran Xanın tərəfdarlarını aksiyaya qoşulmağa çağırıb.
“Hamınızı küçələrə çıxmağa çağırıram. Xüsusilə gəncləri həbsdə olan lideriniz naminə bu yürüşə qoşulmağa səsləyirəm”, – Afridi bildirib.
İmran Xanla Pakistanın siyasi və hərbi rəhbərliyi arasındakı qarşıdurma 2022-ci ildə onun parlamentdə etimadsızlıq səsverməsi nəticəsində hakimiyyətdən uzaqlaşdırılmasından sonra daha da dərinləşib. Xan bunun arxasında ordunun dayandığını iddia edib, Pakistan ordusu isə ittihamı rədd edib.
Gərginlik 2023-cü ilin mayında İmran Xanın həbsindən sonra pik həddə çatıb. Onun tərəfdarları müxtəlif şəhərlərdə etiraz aksiyaları keçirib, bəzi hərbi obyektlərə hücum edilib. Ardınca minlərlə PTI tərəfdarı saxlanılıb, onlarla şəxs isə hərbi məhkəmələr tərəfindən məhkum edilib.
74 yaşlı İmran Xan özünü siyasi məhbus hesab etdiyini bildirir. Pakistan hökuməti və ordu isə bunu rədd edir və məhkəmə proseslərinin müstəqil şəkildə aparıldığını vurğulayır.
“Reuters” qeyd edir ki, İmran Xan bir neçə iş üzrə məhkum olunub, lakin hökmlərin demək olar ki, hamısı sonradan dayandırılıb və ya ləğv edilib. Hazırda qüvvədə qalan bir hökm üzrə apellyasiya prosesi davam edir.
Yürüş əvvəlcə sentyabrın 27-nə planlaşdırılmışdı. Lakin Baş nazir Şahbaz Şərif hökumətinin PTI ilə danışıqlara başlamasından sonra təxirə salınıb. Danışıqlar həftəsonu nəticəsiz başa çatıb.
Paytaxtda isə təhlükəsizlik tədbirləri gücləndirilib. Minlərlə polis və yarımhərbi qüvvə İslamabad və ətrafına yerləşdirilib. Parlament, baş nazirin iqamətgahı və xarici səfirliklərin yerləşdiyi hökumət məhəlləsinə girişlər yük konteynerləri ilə bağlanıb.
Daxili işlər naziri Mohsin Naqvi hökumətin yürüş iştirakçılarının İslamabada daxil olmasına imkan verməyəcəyini deyib.
“Biz bunu birdəfəlik həll edəcəyik”, – Naqvi bildirib və PTI-nin istədiyi vaxt paytaxtın fəaliyyətini pozmasına icazə verilməyəcəyini vurğulayıb.
Hökumət danışıqların PTI-nin Xayber-Paxtunxvada artan silahlı hücumlara qarşı dövlətin terrorla mübarizə siyasəti ilə əməkdaşlıqdan imtina etməsi səbəbindən pozulduğunu bildirir. PTI isə bu versiyanı rədd edir və hökuməti partiyadan əsassız güzəştlər tələb etməkdə ittiham edir.
