Almaniyada bəzi xristian ailələrdən olan uşaqların məktəbdə həmyaşıdları arasında kənarda qalmamaq üçün İslamı qəbul etmək istədiklərinə dair məlumatlar yenidən müzakirə mövzusuna çevrilib. Bununla belə, bu tendensiyanın ölkə üzrə geniş yayıldığını təsdiqləyən rəsmi statistika mövcud deyil.
MSNews.az xəbər verir ki, iddianın ilkin mənbələrindən biri 2024-cü ilin aprelində Almaniya mediasında yayılan məlumatdır. Anonim dövlət təhlükəsizliyi əməkdaşı həmin vaxt getdikcə daha çox alman valideynin məsləhət mərkəzlərinə müraciət etdiyini və bəzi xristian uşaqların məktəbdə “autsayder” vəziyyətinə düşməmək üçün İslamı qəbul etmək istədiklərini söyləmişdi.
Mövzu daha sonra siyasi müstəviyə də daşınıb. Hannoverin Ahlem-Badenştedt-Davenştedt rayon şurasında məsələ ilə bağlı rəsmi sorğu təqdim edilib. Şəhər administrasiyasından məktəblərdə belə halların olub-olmadığı və neçə şagirdin bundan təsirləndiyi soruşulub.
Administrasiyanın cavabı isə məsələnin miqyasına dair ehtiyatlı yanaşma tələb edir. Hannover rəhbərliyi məktəblərdən və məsləhət mərkəzlərindən belə hallar barədə məlumat almadığını və buna görə konkret rəqəmlərə malik olmadığını açıqlayıb. Məktəblərdə bu problemlə bağlı hansı tədbirlərin görüldüyünə dair də şəhər administrasiyasının məlumatının olmadığı bildirilib.
Bu səbəbdən “Almaniyada getdikcə daha çox xristian uşaq İslamı qəbul edir” fikrini təsdiqlənmiş ümummilli tendensiya kimi təqdim etmək mümkün deyil. Mövcud məlumatlar bəzi valideynlərin bu məzmunda müraciətlər etdiyinə dair media məlumatına əsaslanır, lakin ölkə üzrə konversiyaların sayı və səbəbləri barədə sistemli statistika təqdim edilmir.
Məsələnin digər tərəfi də var. Almaniya məktəblərində dini ayrı-seçkilik yalnız qeyri-müsəlman şagirdlərə aid problem deyil. 2025-ci ildə dərc edilmiş akademik araşdırmada Münhendə müsəlman şagirdlərin də dini kimliklərinə görə təcrid, stereotipləşdirmə və zorakılıq halları ilə qarşılaşdıqları müəyyən edilib. Araşdırma 16 müsəlman şagird və beş valideynlə müsahibələrə əsaslandığından nəticələri bütün Almaniyaya şamil etmək mümkün deyil.
