Böyük Britaniyanın baş naziri Endi Börnem ölkəsinin gələcəkdə Avropa İttifaqına yenidən qoşulması ehtimalını istisna etməyib. Baş nazir bildirib ki, Londonun Brüssellə gələcək münasibətləri üçün mövcud vəziyyətin saxlanılmasından tam Aİ üzvlüyünə qədər müxtəlif variantlar nəzərdən keçirilə bilər.
MSNews.az xəbər verir ki, Börnem bu barədə “BBC”-yə müsahibəsində danışıb. O, Böyük Britaniyanın Aİ ilə münasibətlərinin gələcəyi barədə bir neçə mümkün istiqamət göstərib.
Baş nazir bildirib ki, Britaniya hazırkı modeli saxlaya, keçmiş maliyyə naziri Corc Osbornun təklif etdiyi Aİ ilə gömrük ittifaqına qoşulma variantını nəzərdən keçirə və ya Liberal Demokratların irəli sürdüyü Avropa vahid bazarına qayıdış məsələsini müzakirə edə bilər.
Börnem daha sonra əlavə edib:
“Yaxud sona qədər gedə bilərik”.
Baş nazir bu ifadə ilə Böyük Britaniyanın Avropa İttifaqına tam şəkildə yenidən qoşulmasını nəzərdə tutduğunu açıqlayıb. Bununla belə, o, hökumətin artıq Aİ-yə qayıtmaq barədə qərar verdiyini deməyib. Börnem vurğulayıb ki, bütün variantların mümkünlüyü, üstünlükləri və çatışmazlıqları qiymətləndirilməlidir.
Börnem daha əvvəl Britaniyanın öz sağlığında yenidən Aİ üzvü olmasını görmək istədiyini söylədiyini də xatırladıb. Lakin baş nazir bunun məhz indiki mərhələdə baş verməli olduğunu demədiyini xüsusi vurğulayıb.
Bu mövqe Britaniya hökumətinin “Brexit”-dən sonrakı siyasətində nəzərəçarpacaq dəyişiklikdir. Leyboristlərin 2024-cü il seçki proqramında Aİ-nin vahid bazarına və gömrük ittifaqına qayıdış istisna edilirdi. Börnem isə hazırda bu variantların gələcək münasibətlər çərçivəsində müzakirəyə açıq olduğunu bildirir.
