Ermənistanın Baş naziri Nikol Paşinyan Erməni Apostol Kilsəsində vəziyyətin “dəhşətli” olduğunu bildirərək kilsənin “ələ keçirildiyini” iddia edib. Baş nazir kilsədəki vəziyyətlə bağlı parlament istintaq komissiyasının yaradılmasını və sonradan qanunvericilik dəyişikliklərinin nəzərdən keçirilməsini də istisna etməyib.
MSNews.az xəbər verir ki, Paşinyan bu mövqeyini “Boon TV”yə müsahibəsində açıqlayıb.
Baş nazir kilsənin yalnız katolikos və yepiskoplardan ibarət olmadığını, ilk növbədə inanclı icmanı ifadə etdiyini vurğulayıb. Paşinyanın mövqeyinə görə, hazırkı idarəçilik sistemində inanclı əhali kilsənin idarə olunmasında lazımi iştiraka malik deyil. Paşinyan bundan əvvəl də kilsənin mahiyyət etibarilə “inanclı xalq” olduğunu bildirmişdi.
O, Baş nazir Aparatının İctimaiyyətlə Əlaqələr və İnformasiya Mərkəzinin onun tapşırığı ilə Erməni Apostol Kilsəsindəki böhran və onun həlli yollarına dair hesabat hazırladığını açıqlayıb. Paşinyan hesabat əsasında parlamentdə istintaq komissiyasının yaradılmasının mümkün olduğunu, komissiyanın isə qanunvericilik dəyişiklikləri ilə bağlı təkliflər verə biləcəyini deyib.
Sentyabrın 24-də sözügedən hesabat ictimaiyyətə təqdim edilib. Sənəddə kilsədə maliyyə şəffaflığının olmaması, qohumluq əlaqələrinə əsaslanan idarəçilik, ruhanilərə qarşı özbaşına tədbirlər və kilsənin siyasiləşməsi də daxil olmaqla 16 problem müəyyən edildiyi bildirilir. Hesabatda böhrandan çıxış üçün beşmərhələli yol xəritəsi də təklif olunur. Bunlar Ermənistan hökumətinə bağlı qurumun gəldiyi nəticələrdir və kilsənin mövqeyi ilə üst-üstə düşmür.
Hesabatla tanış olduqdan sonra Paşinyan daha sərt açıqlama verərək vəziyyətin düşündüyündən də ciddi olduğunu söyləyib. O, Erməni Apostol Kilsəsinin katolikos II Qareginin dünyəvi adı ilə “Ktriç Nersisyan və onu dəstəkləyən bir qrup ruhani və dünyəvi şəxs tərəfindən ələ keçirildiyini” iddia edib.
Paşinyan hökuməti ilə Erməni Apostol Kilsəsinin rəhbərliyi arasında qarşıdurma uzun müddətdir davam edir. Müqəddəs Eçmiədzin hakimiyyətin addımlarını kilsənin daxili işlərinə müdaxilə kimi qiymətləndirir və onun muxtariyyətinə hörmət edilməsini tələb edir. Kilsə rəhbərliyi hökumətin ruhanilərə qarşı apardığı siyasəti və hüquq-mühafizə tədbirlərini də açıq şəkildə tənqid edib.
