Türkiyə Prezidenti Rəcəb Tayyib Ərdoğan Ankaranın qonşu dövlətlərdən başlayaraq tarixi və mədəni bağlara malik olduğu regionlarla əməkdaşlığı bütün sahələr üzrə gücləndirməyə davam edəcəyini bildirib.
MSNews.az xəbər verir ki, Ərdoğan bu barədə avqustun 30-da Beştəpə Millət Konqres və Mədəniyyət Mərkəzində keçirilən 30 Avqust Zəfər Bayramı xüsusi proqramında çıxışı zamanı danışıb. Türkiyə Prezident Administrasiyasının Kommunikasiya İdarəsinin rəsmi məlumatında onun sözləri belə təqdim olunur:
“Türkiyə olaraq qonşularımızdan başlayaraq könül və mədəniyyət coğrafiyamızla əməkdaşlığımızı bütün sahələrdə qətiyyətlə gücləndirməyə davam edəcəyik.”
Ərdoğan çıxışında sərhədlərin dövlətləri fiziki baxımdan ayıra biləcəyini, lakin xalqlar və insanlar arasındakı tarixi-mənəvi əlaqələri aradan qaldıra bilməyəcəyini deyib. O, xüsusilə əsrlərdir eyni dini və mədəni dəyərləri paylaşan xalqlar arasında əlaqələrin dövlət sərhədlərindən daha dərin olduğunu vurğulayıb.
Türkiyə Prezidenti bu yanaşmanı Ankaranın “terrorçuluqdan azad region” konsepsiyası ilə də əlaqələndirib. Onun sözlərinə görə, Türkiyənin təxminən yarım əsrdir üzləşdiyi terror probleminin daimi həlli istiqamətində irəliləyiş əldə olunub və eyni yanaşmanın region miqyasında genişləndirilməsi nəzərdə tutulur.
Ərdoğan son dövrdə Suriyada baş verən prosesləri də nümunə göstərərək bildirib ki, terrorla bağlı “səhifələr bağlandıqca” bölgədə ümidlər artacaq və yeni siyasi mühit yaranacaq. “Anadolu Agentliyi” onun Türkiyə və region xalqlarının ağır sınaqlardan sonra “tarixdə yeni qızıl səhifə yazmaq imkanı” əldə etdiyini dediyini bildirir.
Ərdoğan bu proses üçün Türkiyə daxilində siyasi və ictimai birliyin mühüm olduğunu vurğulayaraq “böyük Türkiyə uzlaşması”na ehtiyac olduğunu deyib. Prezidentin çıxışından görünür ki, Ankara regional siyasətində qonşularla münasibətlərin genişləndirilməsi, iqtisadi və siyasi əməkdaşlıq, təhlükəsizlik və ortaq tarixi-mədəni bağların ön plana çıxarılmasını paralel istiqamətlər kimi nəzərdən keçirir
