ABŞ Mərkəzi Kəşfiyyat İdarəsinin (MKİ) direktoru Con Retkliff Moskvaya əvvəlcədən açıqlanmayan səfəri zamanı Rusiya rəhbərliyinə Ukraynadakı müharibənin Moskva üçün ağır hərbi və iqtisadi nəticələri barədə ABŞ kəşfiyyatının qiymətləndirməsini çatdırıb.
MSNews.az xəbər verir ki, “The New York Times” hazırkı və keçmiş ABŞ rəsmilərinə istinadən Retkliffin əsas məqsədinin Kremli vəziyyət daha da pisləşməmiş Ukrayna ilə ciddi sülh danışıqlarına sövq etmək olduğunu yazır.
Lakin Retkliff Vladimir Putinlə şəxsən görüşməyib. O, mesajını Rusiya Federal Təhlükəsizlik Xidmətinin rəhbəri Aleksandr Bortnikova çatdırıb. Kremlin sözçüsü Dmitri Peskov da “Reuters”ə bildirib ki, Putin görüşdə iştirak etməyib, lakin səfərin nəticələri barədə məlumatlandırılıb.
“The New York Times”ın məlumatına görə, MKİ analitikləri uzun müddətdir Putinin yaxın çevrəsinin ona müharibənin real gedişi və itkiləri barədə nə dərəcədə obyektiv məlumat verdiyini sual altına alırlar. ABŞ rəsmiləri ümid ediblər ki, keçmiş kəşfiyyatçı olan Putin MKİ direktorundan gələn qiymətləndirməni adi diplomatik kanallardan ötürülən mesajdan daha ciddi qəbul edə bilər.
Retkliff Bortnikova Rusiyanın hərbi və iqtisadi vəziyyətini ağır qiymətləndirdiyini bildirərək Moskvanın müharibəni bitirmək üçün ciddi danışıqlara keçməsinin vaxtının çatdığı qənaətini çatdırıb. Nəşrin məlumatına görə, MKİ direktoru söhbət zamanı Rusiya tərəfinə hər hansı ultimatum və ya konkret nəticələrlə bağlı təhdid irəli sürməyib.
Retkliff avqustun 25-də Moskvaya gedib və təxminən səkkiz saat Rusiya paytaxtında qalıb. ABŞ Prezidenti Donald Tramp sonradan səfəri “yarı-rutin” xarakterli adlandıraraq bunun Ukraynadakı müharibənin başa çatdırılmasına kömək edə biləcəyinə ümid etdiyini söyləyib. “Reuters” səfərin 2021-ci ildən bəri ABŞ kəşfiyyat rəhbərinin Rusiyaya ilk belə səfəri olduğunu qeyd edir.
