ABŞ Prezidenti Donald Tramp ölkə tarixindəki prezidentlərin öz versiyasına uyğun reytinqini dərc edərək özünü ən yüksək – “Ən böyük” kateqoriyasına daxil edilən yeganə dövlət başçısı kimi göstərib.
MSNews.az xəbər verir ki, Tramp reytinq cədvəlini avqustun 28-də “Truth Social” hesabında paylaşıb.
Siyahıda ABŞ prezidentləri müxtəlif səviyyələr üzrə qruplaşdırılıb. Trampın fotosu isə digər dövlət başçılarından ayrıca, cədvəlin ən yuxarı hissəsində yerləşdirilib və “Ən Böyük” (“The Greatest”) kateqoriyasına daxil edilib.
ABŞ tarixinin ən tanınmış prezidentlərindən Corc Vaşinqton və Abraham Linkoln isə Trampdan bir pillə aşağı – “Great” (“Böyük”) kateqoriyasında göstərilib.
Trampın siyasi rəqiblərinə münasibəti də reytinqdə öz əksini tapıb. Demokrat prezidentlərin bir qismi siyahının aşağı pillələrində yerləşdirilib.
Xüsusilə, Trampın sələfi Co Bayden ən aşağı kateqoriyaya salınıb. Tramp uzun müddətdir Bayden administrasiyasını iqtisadiyyat, miqrasiya, xarici siyasət və digər məsələlərə görə sərt tənqid edir.
Paylaşım Trampın öz prezidentliyini ABŞ tarixindəki digər administrasiyalarla müqayisə edərək yüksək qiymətləndirdiyi əvvəlki açıqlamaları ilə də səsləşir. O, müxtəlif çıxışlarında administrasiyasının fəaliyyətini ABŞ tarixinin ən uğurlu prezidentlik dövrlərindən biri kimi təqdim edib.
Bununla belə, Trampın paylaşdığı cədvəl akademik araşdırmaya, tarixçilər arasında keçirilmiş sorğuya və ya ABŞ dövlət qurumlarının rəsmi qiymətləndirməsinə əsaslanan prezident reytinqi deyil. Bu, Trampın sosial şəbəkədə paylaşdığı subyektiv siyasi sıralamadır.
ABŞ prezidentlərinin akademik reytinqləri adətən tarixçilər və siyasi elmlər üzrə mütəxəssislər arasında keçirilən sorğular əsasında hazırlanır və prezidentlər liderlik, iqtisadi idarəçilik, böhranların həlli, xarici siyasət və tarixi irs kimi müxtəlif meyarlarla qiymətləndirilirlər.
