Azərbaycan Prezidenti İlham Əliyev və birinci xanım Mehriban Əliyeva avqustun 24-də Özbəkistanın paytaxtı Daşkənddən Buxara şəhərinə gəliblər.
MSNews.az xəbər verir ki, Buxara Beynəlxalq Hava Limanında Azərbaycan Prezidenti və birinci xanımı Özbəkistan Prezidenti Şavkat Mirziyoyev və xanımı Ziroatxon Mirziyoyeva qarşılayıblar. Məlumat Azərbaycan Prezidentinin rəsmi saytında da təsdiqlənib.
“Report” da dövlət başçısının Özbəkistana səfər proqramının Buxarada davam etdiyini bildirib.
İlham Əliyev Özbəkistana dövlət səfərinə avqustun 23-də gəlib. Daşkənddə səfər çərçivəsində Azərbaycan və Özbəkistan liderlərinin təkbətək görüşü, Ali Dövlətlərarası Şuranın üçüncü iclası, bir sıra layihələrin açılış və təməlqoyma mərasimləri keçirilib.
Buxara proqramı çərçivəsində Azərbaycan və Özbəkistan prezidentləri, birinci xanımlar və ailə üzvləri daha sonra şəhərdəki İsmayıl Samani türbəsi ilə də tanış olublar.
