Çinin paytaxtı Pekində tez-tez “robotların Olimpiadası” adlandırılan II Dünya Humanoid Robot Oyunları başlayıb. Beş gün davam edəcək yarışlarda 16 ölkədən 666 komandanın ümumilikdə 2056 robotu iştirak edir.
MSNews.az xəbər verir ki, “Anadolu Agentliyi” yarışların avqustun 22-dən 26-dək Pekinin Milli Sürət Konkisürmə Ovalında — “Ice Ribbon” arenasında keçirildiyini bildirir. Proqrama ümumilikdə 51 yarış növü və 1301 qarşılaşma daxildir. Bunlardan 30-u idman, 21-i isə real həyat şəraitinə uyğunlaşdırılmış ssenari əsaslı tapşırıqlardır.
Robotlar qaçış, futbol, gimnastika, ağır atletika, kəndirdartma və döyüş sənətləri kimi yarışlarla yanaşı, fabrik, restoran, ofis və fövqəladə vəziyyət şəraitini imitasiya edən tapşırıqlarda da bacarıqlarını nümayiş etdirirlər. “Reuters” yazır ki, proqramda elektrik avtomobilinin enerji doldurma kabelini qoşmaq, sənaye yığımı, materialların daşınması və anbar əməliyyatları kimi praktik sınaqlar da var. Yarışların 40 faizindən çoxunda robotların tam avtonom işləməsi tələb olunur.
Təşkilatçılar bu tapşırıqlar vasitəsilə robotların yalnız sürət və fiziki çevikliyini deyil, görmə sistemlərini, koordinasiyasını, tarazlığını, qərarvermə qabiliyyətini və insan müdaxiləsi olmadan səhvlərdən çıxmaq bacarığını da sınaqdan keçirirlər. “Reuters”in məlumatına görə, əsas məqsədlərdən biri humanoid robotların laboratoriya nümayişlərindən real istehsal və xidmət sahələrinə keçid imkanlarını qiymətləndirməkdir.
Oyunların ilk günündə sürət yarışları da diqqət çəkib. “Reuters” iki humanoid robotun 100 metr məsafəni Useyn Boltun 9,58 saniyəlik insan dünya rekordundan daha qısa müddətdə tamamladığını bildirib. Bununla yanaşı, yüksək sürətdə robotların finişdən sonra dayanması hələ də texniki problemlərdən biri olaraq qalır.
Çinin dövlət agentliyi “Xinhua” yarış proqramına atletika, futbol, gimnastika, ağır atletika və döyüş sənətləri ilə yanaşı fabrik, otel, ev, xəstəxana, pərakəndə satış və fövqəladə vəziyyət ssenarilərinin daxil edildiyini bildirir.
Bu il oyunların miqyası ciddi şəkildə böyüyüb. 2025-ci ildə keçirilən ilk turnirdə 16 ölkədən 280 komanda və 500-dən çox humanoid robot iştirak etmişdi. İkinci yarışda komandaların sayı 666-ya, robotların sayı isə 2056-ya yüksəlib.
