Pentaqon rəhbəri Pit Heqsetin həyat yoldaşı Cennifer Heqsetin nazirliyin fəaliyyətində qeyri-adi dərəcədə təsirli rol oynadığı bildirilir.
MSNews.az xəbər verir ki, “The New York Times” 20-yə yaxın hazırkı və keçmiş administrasiya rəsmisi və digər mənbələrlə söhbətlər əsasında Cennifer Heqseti ərinin “ən nüfuzlu məsləhətçisi” və Pentaqondakı faktiki prodüseri kimi xarakterizə edib. Qəzetin məlumatına görə, o, Pit Heqseti ictimai çıxışlara hazırlayır, potensial əməkdaşlarla müsahibələrdə iştirak edir və Müdafiə Nazirliyinin media məzmunu ilə bağlı ideyaların müzakirəsinə qoşulur.
Cennifer Heqset bundan əvvəl 18 il “Fox News”-da çalışıb və Pit Heqsetin televiziya fəaliyyətində prodüserlik edib. “The Washington Post” hələ 2025-ci ilin aprelində onun ərinin media çıxışlarının koordinasiyasında və Pentaqona işə qəbul ediləcək namizədlərlə görüşlərdə iştirak etdiyini yazmışdı.
Cennifer Heqsetin iştirakı xüsusilə 2025-ci ilin martında Britaniyanın müdafiə naziri Con Hili və yüksək rütbəli britaniyalı hərbçilərlə keçirilən görüşdən sonra müzakirələrə səbəb olmuşdu. Görüş ABŞ-nin Ukrayna ilə hərbi kəşfiyyat məlumatlarının mübadiləsini müvəqqəti dayandırmasından bir gün sonra baş tutmuşdu.
“The New York Times”ın son məlumatına görə, britaniyalı rəsmilər Cennifer Heqsetin otaqda olması səbəbindən Ukraynadakı britaniyalı personal və ABŞ kəşfiyyatının dayandırılmasının yaradacağı risklər barədə yalnız ümumi şəkildə danışıblar. Daha detallı müzakirənin isə onun iştirakı olmadan keçirilən kiçik görüşdə aparıldığı bildirilir.
Pentaqon bu təqdimatla razılaşmır. Nazirliyin sözçüsü Şon Parnell bildirib ki, Cennifer Heqset həmin görüşdə yalnız təqdimat mərhələsində iştirak edib və qısa müddət sonra otağı tərk edib. Onun məxfi məlumatların müzakirə edildiyi heç bir Müdafiə Nazirliyi görüşündə iştirak etmədiyi vurğulanıb.
Cennifer Heqset artıq Ağ Evdə də rəsmi funksiyaya malikdir. Prezident Donald Tramp avqustun 3-də yaradılan Prezidentin Hərbi Həyat Yoldaşları Komissiyasına rəhbərliyi müdafiə nazirinin həyat yoldaşına həvalə edib. Bununla belə, bu vəzifə onun Pentaqonun operativ idarəetmə strukturunda rəsmi müşavir olması anlamına gəlmir.
