Almaniya təhlükəsizlik orqanları Berlin yaxınlığındakı meşəlik ərazidə iki odlu silah və sursatın gizlədildiyi anbar aşkarlayıb. İstintaq materiallarında anbarın xarici kəşfiyyat fəaliyyəti ilə əlaqəli ola biləcəyi araşdırılır, Almaniya mediasında isə Rusiya xüsusi xidmətlərinə dair şübhələr yer alıb.
MSNews.az xəbər verir ki, “NDR”, “WDR” və “Süddeutsche Zeitung”un birgə araşdırmasına əsasən, Almaniyanın Federal Konstitusiyanın Müdafiəsi İdarəsinin (BfV) əlində anbarın Rusiya xüsusi xidmətləri ilə əlaqəli olduğuna dair məlumatlar var. Mənbələr silahların Moskvadan göstəriş alan agentlərin Almaniyada “kinetik əməliyyatlar” — fiziki hücum və ya sui-qəsdlər həyata keçirməsi üçün nəzərdə tutulduğunu ehtimal edir. BfV konkret kəşfiyyat məlumatlarına açıq şərh verməyib.
Almaniyanın daxili işlər naziri Aleksandr Dobrindt bildirib ki, xüsusi xidmət 2025-ci ilin oktyabrında Berlin kənarındakı meşədə mümkün silah gizlədilməsi barədə məlumat alıb. Polis və kəşfiyyat əməkdaşları ərazidə iki tapança və sursat aşkarlayıblar. Silahlar təhlükəsiz hala gətirildikdən sonra anbar mümkün götürən şəxslərin müəyyənləşdirilməsi məqsədilə aylarla nəzarətdə saxlanılıb, lakin heç kim ora yaxınlaşmayıb.
Dobrindt Rusiya ilə birbaşa əlaqəni təsdiqləməyib və yalnız işdə “xarici qüvvələrin iştirakının istisna edilmədiyini” bildirib. Nazir silahların mümkün hücum planlarında istifadə üçün nəzərdə tutulduğunu düşündüklərini açıqlayıb. “Reuters”in məlumatına görə, Almaniya kəşfiyyatındakı mənbələr isə anbarın Rusiya kəşfiyyatının sifarişi ilə mümkün sui-qəsdlər üçün yaradıldığı qənaətindədir.
Almaniya təhlükəsizlik strukturları son aylarda Rusiya xüsusi xidmətlərinin ölkədə müdafiə sənayesi rəhbərləri və mühacirətdə yaşayan müxalif şəxslərə qarşı hücumlar planlaşdıra biləcəyi barədə xəbərdarlıq edib. Ukraynaya dəstək göstərən şəxslər və infrastruktura qarşı mümkün təxribatlar da təhlükəsizlik orqanlarının diqqətindədir. Bununla belə, həmin şəxslərdən hər hansı birinin məhz aşkarlanan silah anbarı ilə bağlı konkret hədəf olduğuna dair rəsmi məlumat açıqlanmayıb.
İş üzrə şübhəlilərdən biri Rumıniyada saxlanılır. Dobrindt onu xarici xüsusi xidmət üçün tapşırıqlar yerinə yetirən aşağı səviyyəli agent kimi xarakterizə edib. Federal Prokurorluq həmin şəxslə bağlı kəşfiyyat fəaliyyəti və dövlət təhlükəsizliyinə qarşı ağır zorakı cinayətə hazırlıq şübhəsi üzrə araşdırma aparır. “Reuters” yazır ki, şübhəli Rumıniyada poçt bağlamalarına yerləşdirilmiş partlayıcılarla hücum planları ilə əlaqədar da saxlanılıb. Almaniya onun mümkün ekstradisiyası ilə bağlı Rumıniya tərəfi ilə əlaqə saxlayır.
Hadisə ilə bağlı Rusiya tərəfinin məsuliyyətini təsdiqləyən yekun rəsmi qərar hələ açıqlanmayıb. “NDR”, “WDR” və “Süddeutsche Zeitung”un sorğusuna Rusiya səfirliyinin ilkin olaraq cavab vermədiyi bildirilib.
