Azərbaycan tərəfindən cinayət işi çərçivəsində beynəlxalq axtarışa verilən Aleksey Çadayev Rusiya nəqliyyat nazirinin ictimai əsaslarla müşaviri səlahiyyətlərini dayandırmaq qərarına gəldiyini açıqlayıb.
MSNews.az xəbər verir ki, Çadayev öz Telegram kanalında qərarını birbaşa Azərbaycanla yaranmış vəziyyətlə əlaqələndirib. O bildirib ki, podkastlarda və sosial şəbəkələrdə səsləndirdiyi fikirlər şəxsi ekspert mövqeyidir və bunların Rusiya Nəqliyyat Nazirliyinin fəaliyyəti ilə əlaqələndirilməsini düzgün hesab etmir.
Çadayev qərarının səbəbini belə izah edib: şəxsi ekspert mövqeyinin və ictimai çıxışların dövlətlərarası münasibətlərə təsir göstərməsini, ölkələrin birgə fəaliyyətinə maneələr yaratmasını istəmir. O, xüsusilə Rusiya Nəqliyyat Nazirliyinin Azərbaycan istiqamətində “Şimal-Cənub” beynəlxalq nəqliyyat dəhlizinin inkişafı ilə məşğul olduğunu vurğulayıb.
Çadayevin açıqlaması Bakının ardıcıl hüquqi və diplomatik addımlarından sonra verilib. Azərbaycan Baş Prokurorluğunun məlumatına görə, Çadayev, Semyon Uralov və “Moskva 24”ün aparıcısı İvan Knyazev iyulun 14-də və avqustun 13-də “Чистота понимания” proqramında səsləndirdikləri fikirlərə görə Cinayət Məcəlləsinin 214-2, 281.2 və 283.2.1-ci maddələri üzrə təqsirləndirilən şəxs qismində cəlb ediliblər. Onlar barəsində həbs qətimkan tədbiri seçilib və beynəlxalq axtarış prosedurlarına başlanılıb.
Baş Prokurorluğun versiyasına görə, iyulun 14-də yayımlanan proqramda Azərbaycana qarşı zorakı üsullardan istifadə, ölkənin konstitusiya quruluşunun zorla dəyişdirilməsi və ərazi bütövlüyünün pozulması ilə bağlı çağırışlar səsləndirilib. Avqustun 13-dəki buraxılışda isə ayrı-ayrı şəxslərin fiziki məhv edilməsi və “ünvanlı şəkildə sıradan çıxarılması” barədə fikirlərin terrorçuluğa açıq çağırış əlamətləri yaratdığı bildirilib.
Avqustun 18-də Rusiyanın Azərbaycandakı səfiri Mixail Yevdokimov da Azərbaycan XİN-ə çağırılıb. Bakı Rusiya informasiya məkanında Azərbaycan, Azərbaycan xalqı və ölkə rəhbərliyi əleyhinə səslənən təhdid və təhqirlərlə bağlı qəti etirazını bildirib.
Diqqətçəkən digər məqam iyulun 14-də yayımlanmış “Сколько в России агентов Алиева?” adlı “Чистота понимания” buraxılışının artıq Semyon Uralovun “YouTube” kanalında əlçatan olmamasıdır. “The Moscow Times” da həmin yayımın hazırda əlçatmaz olduğunu qeyd edir. Bununla belə, verilişin mətn transkripti digər internet resurslarında qalır.
Çadayevin müşavir vəzifəsi ictimai əsaslarla, yəni maaş və ayrıca kabinet nəzərdə tutulmadan həyata keçirilirdi. O, yanvar ayında Rusiya nəqliyyat nazirinin müşaviri təyin olunduğunu özü açıqlamışdı. Hazırda Rusiya Nəqliyyat Nazirliyinin onun səlahiyyətlərinin dayandırılması barədə ayrıca rəsmi açıqlaması aşkarlanmayıb.
