Azərbaycanın titullu paracüdoçusu İlham Zəkiyev 10-cu dəfə Avropa çempionu adını qazanıb. O, Almaniyanın Heydelberq şəhərində keçirilən 2026-cı il IBSA Judo Avropa Çempionatında J1, +95 kq çəki dərəcəsində qızıl medala sahib olub.
MSNews.az xəbər verir ki, Zəkiyev yarımfinalda Böyük Britaniya təmsilçisi Daniel İnqliş üzərində ipponla qələbə qazanaraq finala yüksəlib. Həlledici görüşdə isə ispaniyalı Rodriqo Suares Qarrosanı məğlub edərək fəxri kürsünün ən yüksək pilləsinə qalxıb. Bu nəticə ilə azərbaycanlı paracüdoçu karyerasında 10-cu Avropa çempionluğunu rəsmiləşdirib.
Bu barədə “AZƏRTAC” məlumat yayıb.
Beynəlxalq Cüdo Federasiyasının (IJF) rəsmi nəticələrində J1, +95 kq kateqoriyasında Zəkiyevin birinci, Suarez Garrosanın ikinci, moldovalı Ion Basoc və britaniyalı Daniel Englishin isə üçüncü yerləri tutduğu göstərilir.
IJF Zəkiyevin uğurunu xüsusi qeyd edərək onun 2004 və 2008-ci illərdə Paralimpiya çempionu olduğunu, daha sonra London, Tokio və Paris Paralimpiya Oyunlarında üç bürünc medal qazandığını və üçqat dünya çempionu olduğunu xatırladıb. 2004-cü ildə ilk Paralimpiya qızılını qazanan Zəkiyev 22 il sonra da Avropanın ən güclüsü olmağı bacarıb.
Heydelberqdə keçirilən çempionatda 23 Avropa ölkəsindən 119 paracüdoçu fərdi yarışlarda iştirak edib. Azərbaycan yığmasının heyətində Saleh Sultanov və Dürsədəf Kərimova da bürünc medal qazanıblar.
