Avqustun 10-da Litvanın Baş naziri Mindauqas Sinkeviçius Azərbaycan Prezidenti İlham Əliyevə zəng edib. Telefon danışığı zamanı Azərbaycan-Litva münasibətlərinin son dövrdə müsbət dinamika ilə inkişaf etdiyi bildirilib.
Tərəflər bu kontekstdə Litvanın sabiq Baş naziri İnqa Ruqinyenenin bu ilin aprelində Azərbaycana səfərini və Prezident İlham Əliyevlə keçirdiyi görüşü xatırladıblar. Ruqinyene aprelin 9-da Bakıda dövlət başçısı tərəfindən qəbul edilmişdi.
Prezident İlham Əliyev Mindauqas Sinkeviçiusu Litvanın Baş naziri seçilməsi münasibətilə təbrik edib. Sinkeviçius isə təşəkkürünü bildirərək yeni vəzifəsində Azərbaycanla ikitərəfli münasibətlərin inkişafına xüsusi diqqət yetirəcəyini deyib.
Telefon danışığında enerji sahəsində, xüsusilə enerji təhlükəsizliyi istiqamətində əməkdaşlıq, eləcə də iki ölkə arasında ticarət dövriyyəsinin artırılması imkanları müzakirə olunub.
Litvanın Baş naziri Prezident İlham Əliyevi Vaşinqton Sülh Sammitinin və orada əldə olunan razılaşmaların birinci ildönümü münasibətilə də təbrik edib. Tərəflər Azərbaycan-Avropa İttifaqı münasibətlərinə toxunaraq son dövrdə yüksək səviyyəli təmasların əməkdaşlığın inkişafına töhfə verdiyini qeyd ediblər. Litvanın Azərbaycanın Avropa İttifaqı ilə əməkdaşlığının genişlənməsinə verdiyi dəstək də vurğulanıb.
Söhbət zamanı tərəflər beynəlxalq gündəlikdəki aktual məsələlər ətrafında da fikir mübadiləsi aparıblar.
