Yaponiyada 8 avqust 2026-cı il — “8/8/8” tarixi nikaha daxil olmaq istəyən cütlüklər arasında böyük marağa səbəb olub. Tokionun bir sıra rayonlarında xüsusi nikah qeydiyyatı məntəqələri yaradılıb, cütlüklər üçün xatirə tədbirləri keçirilib.
MSNews.az xəbər verir ki, Yaponiyanın Reyva təqviminə əsasən 2026-cı il Reyva erasının 8-ci ilidir. Beləliklə, avqustun 8-i “8-ci ilin 8-ci ayının 8-ci günü” — 8/8/8 kombinasiyasını yaradıb. Yapon mədəniyyətində “八” — səkkiz heroqlifi aşağıya doğru genişləndiyi üçün suehirogari, yəni gələcəkdə genişlənmə, firavanlıq və uğur simvolu hesab olunur. Tokio hökuməti də 2026-cı ili məhz bu simvolika əsasında nikahların təşviqinə həsr olunmuş “TOKYO 八結び” kampaniyası ilə qeyd edir.
Yaponiyanın “Kyodo News” agentliyinin məlumatını yayımlayan “Nikkan Sports” yazır ki, avqustun 8-də ölkənin müxtəlif yerlərində nikah sənədlərini təqdim edən cütlüklər üçün xüsusi tədbirlər təşkil olunub.
Ən böyük sıxlıqlardan biri Tokionun Ota rayonunda qeydə alınıb. Səhər saatlarından etibarən rayon administrasiyasına 100-dən çox cütlük müraciət edib. Yeni evlənənlər üçün xüsusi fotozona yaradılıb və rayonun rəsmi maskotu “Hanepyon” ilə xatirə şəkilləri çəkilib.
Ota administrasiyası hələ avqustun 3-də bu gün üçün ayrıca nikah tədbiri elan etmişdi. Saat 10:00-dan 15:00-dək xüsusi qəbul məntəqəsi fəaliyyət göstərib, nikah sənədlərinin rəngli surətləri və xatirə çərçivələri təqdim olunub. İlk 300 iştirakçı üçün xüsusi hədiyyələr də nəzərdə tutulmuşdu. Bu barədə Ota rayonunun rəsmi saytı məlumat yayıb.
Tokionun Şincuku rayonu da avqustun 8-i üçün müvəqqəti nikah qeydiyyatı pəncərəsi açıb və ilk 150 cütlüyə xatirə hədiyyələri təqdim edib. Katsuşika rayonunda isə ayrıca nikah qəbulu məntəqəsi və fotozona yaradılıb.
Tokio hökuməti bu tarixi hətta “Hachimitsu Musubi no Hi” — “888 nikah günü” kimi xüsusi kampaniyaya çevirib. Avqustun 8-də nikaha daxil olan və müəyyən şərtlərlə xatirə fotosunu sosial şəbəkədə paylaşan cütlüklərə 8888 Tokio balı təqdim olunur. Proqram üzrə ümumilikdə 8 min cütlüyün mükafatlandırılması nəzərdə tutulub.
Beləliklə, “8/8/8” Yaponiyada hüquqi baxımdan digər günlərdən fərqlənməsə də, “8” rəqəminin uğur və firavanlıq simvolu olması bu tarixi 2026-cı ilin ən populyar nikah günlərindən birinə çevirib.
