“Polymarket” Kriştianu Ronaldunun DÇ-2026 zamanı ağlayıb-ağlamaması ilə bağlı açılan mübahisəli proqnoz bazarını “Yes” nəticəsi ilə qiymətləndirib.
MSNews.az xəbər verir ki, “Polymarket”in bazar səhifəsində “Will Ronaldo Cry at the World Cup?” adlı proqnozun hazırda “Yes” üzrə 100 faiz göstərildiyi, ümumi ticarət həcminin isə 31,5 milyon dollar olduğu qeyd olunur. Bu səbəbdən sosial şəbəkələrdə yayılan 153 milyon dollarlıq mərc iddiası hələlik rəsmi təsdiqini tapmayıb.
Mübahisə Portuqaliyanın DÇ-2026-nın 1/8 finalında İspaniyaya 0:1 hesabı ilə məğlub olmasından sonra yaranıb. İspaniya 91-ci dəqiqədə Mikel Merinonun qolu ilə qələbə qazanıb, Portuqaliya turnirlə vidalaşıb, Ronaldu isə bunun onun son dünya çempionatı olduğunu təsdiqləyib.
“TheStreet” yazır ki, matçdan sonra “Polymarket” istifadəçiləri Ronaldunun emosional reaksiyasının bazarın “Yes” şərtlərinə uyğun olub-olmamasını müzakirə ediblər. Platformada şərtlər yalnız Ronaldonun meydanda və ya ehtiyat oyunçular skamyasında üzü görünən şəkildə ağlamasını nəzərdə tuturdu. Sadəcə emosional görünməsi, gözlərini silməsi və ya kövrəlməsi nəticənin “Yes” sayılması üçün kifayət etmirdi.
“KuCoin”in “Odaily”ə istinadən yaydığı məlumata görə, bazar əvvəlcə mübahisə mərhələsinə keçib və “Yes” ehtimalı bir ara 20 faizdən aşağı düşüb. Daha sonra “Polymarket” əlavə izah verərək Portuqaliya–İspaniya matçından sonra meydanda çəkilmiş foto və videolarda Ronaldunun üzündə görünən göz yaşlarının bazar şərtlərinə uyğun olduğunu bildirib. Bundan sonra “Yes” ehtimalı 99 faizdən yuxarı qalxıb.
Eyni mənbə hadisə ilə bağlı ümumi həcmin 22 milyon dolları keçdiyini yazsa da, “Polymarket”in öz səhifəsində bu rəqəm 31,5 milyon dollar kimi göstərilir. 153 milyon dollar iddiası isə etibarlı mənbələrdə təsdiqlənmədiyi üçün qəti fakt kimi təqdim edilmir.
