Argentina Prezidenti Xavyer Mileinin İsrailyönlü çıxışı Yaxın Şərqdə davam edən gərginlik fonunda siyasi və dini ritorikanın yenidən gündəmə gəlməsinə səbəb olub.
MSNews.az “Buenos Aires Times”-a istinadən xəbər verir ki, Milei Buenos-Ayresdə İsrail Müttəfiqləri Fondunun Latın Amerikası konfransında çıxış edərək region ölkələrini İsraillə daha sıx əməkdaşlığa çağırıb. O, çıxışında “neytrallığın mümkün olmadığını” bildirib və İsraili “terror təşkilatları və İran kimi rejimlərə qarşı Qərbin son müdafiə xətti” kimi təqdim edib.
Milei çıxışının bir hissəsində antisemitizmdən danışarkən bibliyadakı Amalek obrazına istinad edib. “Newsrael”-in yaydığı çıxış fraqmentində Argentina liderinin “Amalek tək bir döyüşün personajı deyil, hər nəsildə yeni sima ilə qayıdan şər formasıdır” dediyi bildirilir. Həmin fraqmentə görə, Milei bu gün bu obrazı “Tehran rejimi, HƏMAS, ‘Hizbullah’ və onları dəstəkləyən şəbəkə” ilə əlaqələndirib.
“JNS” yazır ki, Milei çıxışında Latın Amerikası ölkələrini İsraillə əlaqələri gücləndirməyə yönələn “İshaq Sazişləri” təşəbbüsünə qoşulmağa çağırıb. O bildirib ki, Argentina prezidentliyinin ilk günündən ölkəni “tarixin doğru tərəfində” yerləşdirmək qərarı verib.
Mileinin İsrailə açıq dəstəyi onun xarici siyasət xəttinin əsas istiqamətlərindən biri hesab olunur. “Associated Press” daha əvvəl yazmışdı ki, katolik ailəsində böyüyən Milei son illərdə iudaizmə marağını açıq göstərir və yəhudiliyi qəbul etmək niyyətindən danışıb.
Argentina Milei hakimiyyəti dövründə HƏMAS-a qarşı da sərt mövqe tutub. Argentina Prezident Ofisinin rəsmi açıqlamasında HƏMAS-ın 2024-cü ilin iyulunda beynəlxalq terror təşkilatı kimi tanındığı bildirilib. Rəsmi Buenos-Ayres bu qərarı 7 oktyabr hücumları və HƏMAS-ın İranla əlaqələri ilə əsaslandırıb.
Bundan başqa, “Reuters” agentliyinin məlumatına görə, Argentina 2026-cı ilin aprelində İran İslam İnqilabı Keşikçiləri Korpusunu da terror təşkilatı kimi tanıyıb. Buenos-Ayres bu addımı korpusun “Hizbullah”a dəstəyi və Argentina ərazisində törədilmiş terror aktları ilə əlaqələndirib.
Amalek istinadı İsrail-Fələstin müharibəsi kontekstində daha əvvəl də mübahisə doğurmuşdu. İsrailin baş naziri Benyamin Netanyahunun 2023-cü ilin oktyabrında “Amalekin sənə nə etdiyini xatırla” ifadəsini işlətməsi Cənubi Afrikanın İsrailə qarşı Beynəlxalq Ədalət Məhkəməsində qaldırdığı soyqırımı işində ritorik arqumentlərdən biri kimi göstərilib. İsrail tərəfi isə bu ittihamları rədd edib və ifadənin HƏMAS-a münasibətdə istifadə olunduğunu bildirib.
Hazırda Mileinin sözləri daha çox onun İsraillə siyasi yaxınlığının və İran, HƏMAS, “Hizbullah”a qarşı sərt mövqeyinin göstəricisi kimi qiymətləndirilir. Bununla belə, Amalek kimi dini obrazların müasir siyasi münaqişələrdə istifadəsi beynəlxalq hüquq və insan haqları müzakirələrində həssas ritorika sayılır.
