Türkiyə ilə Avropa İttifaqı arasında uzun müddətdir müzakirə olunan viza məsələsi yenidən diplomatik gündəmin əsas mövzularından birinə çevrilib.
MSNews.az “Politico”-ya istinadən xəbər verir ki, Brüsseldə Türkiyə vətəndaşları üçün viza rejiminin sadələşdirilməsi imkanları nəzərdən keçirilir. Nəşrin məlumatına görə, məsələ Aİ-nin xarici siyasət və təhlükəsizlik üzrə ali nümayəndəsi Kaya Kallas, genişlənmə üzrə komissar Marta Kos və daxili işlər və miqrasiya üzrə komissar Maqnus Brunnerin Ankaraya səfəri zamanı müzakirə olunub.
Türkiyə Xarici İşlər Nazirliyinin yaydığı birgə açıqlamada bildirilib ki, Hakan Fidan, Kaya Kallas, Marta Kos və Maqnus Brunner iyunun 30-da Ankarada görüşüblər. Görüşdə Türkiyə-Aİ münasibətləri, iqtisadi və ticari əməkdaşlıq, miqrasiya, təhlükəsizlik, regional məsələlər, həmçinin Türkiyə vətəndaşlarının viza müraciətləri və prosedurları müzakirə olunub. Rəsmi bəyanatda tərəflərin “viza liberallaşdırılması dialoqunun hazırkı vəziyyəti” barədə fikir mübadiləsi apardığı qeyd edilib.
Bununla belə, hələlik Türkiyə vətəndaşları üçün vizasız rejimə keçidlə bağlı yekun qərar elan edilməyib. Bu səbəbdən mövcud məlumatlar Aİ daxilində viza prosedurlarının yüngülləşdirilməsi və ya viza liberallaşdırılması prosesinin yenidən canlandırılması istiqamətində müzakirələr kimi qiymətləndirilir.
“Reuters”-in daha əvvəl yaydığı məlumata görə, Avropa İttifaqı Türkiyə vətəndaşları üçün Şengen vizası prosedurlarını müəyyən qədər sadələşdirib. Yeni qaydalara əsasən, əvvəlki vizalarından qanuni şəkildə istifadə edən Türkiyə vətəndaşları mərhələli qaydada daha uzunmüddətli, çoxgirişli Şengen vizaları ala bilirlər.
Avropa Komissiyasının Miqrasiya və Daxili İşlər üzrə Baş Direktorluğunun məlumatında da qeyd olunur ki, Türkiyədə yaşayan və müəyyən səyahət tarixçəsi olan Türkiyə vətəndaşları üçün “cascade” rejimi tətbiq edilir. Bu mexanizm çərçivəsində uyğun müraciətçilər əvvəlcə birillik, daha sonra üçillik və beşillik çoxgirişli Şengen vizası əldə edə bilərlər. Avropa Komissiyası bu qaydaların Türkiyə və Şengen zonası arasında artan səyahət tələbi fonunda qəbul edildiyini bildirib.
Türkiyə 1987-ci ildə Avropa İttifaqına üzvlük üçün rəsmi müraciət edib, 1999-cu ildə isə namizəd ölkə statusu alıb. Türkiyə ilə üzvlük danışıqları 2005-ci ildə başlayıb, lakin proses 2018-ci ildən faktiki olaraq dayanmış vəziyyətdədir. Aİ və Türkiyə arasında assosiasiya sazişi isə 1963-cü ildə imzalanıb.
Aİ-nin rəsmi məlumatına əsasən, Türkiyə ilə viza liberallaşdırılması dialoqu 2013-cü ildə başlayıb və vizasız rejimə keçid üçün Ankaranın yerinə yetirməli olduğu 72 meyar müəyyənləşdirilib. Proses hələlik yekunlaşmayıb.
