Ukrayna Prezidenti Volodimir Zelenski müharibənin dayandırılması ilə bağlı mümkün görüş barədə açıqlama verib.
MSNews.az xəbər verir ki, Zelenski axşam videomüraciətində Ukraynanın bu istiqamətdə təkliflərini əsas tərəfdaşlara çatdırdığını bildirib.
Ukrayna liderinin sözlərinə görə, Kiyev Putinin “dostları” adlandırdığı tərəflərə də mümkün görüş və müharibənin dayandırılması ilə bağlı mövqeyini çatdırıb.
“Rusiya bu müharibəni Ukraynadan özü ilə aparmalıdır — bizə müharibə lazım deyil. Ukrayna əsas tərəfdaşlara təkliflər göndərib və Putinin dostları da bizdən eşidiblər ki, görüş mümkündür, bu müharibənin dayandırılması mümkündür. Lazımdır ki, Rusiya sülhə doğru bu addımı atsın”, — Zelenski bildirib.
Ukrayna Prezidenti çıxışında konkret hansı ölkə və ya vasitəçilərin nəzərdə tutulduğunu açıqlamayıb. Lakin onun sözləri Kiyevin diplomatik kanallar vasitəsilə Moskvanı danışıqlara məcbur etməyə çalışdığını göstərir.
Zelenski həmçinin Ukrayna ordusunun Rusiyanın hərbi imkanlarına qarşı uzaqmənzilli və orta mənzilli zərbələri davam etdirdiyini vurğulayıb. O, bu addımları Rusiyanın başlatdığı müharibəyə “ədalətli cavab” adlandırıb.
Ukrayna lideri qeyd edib ki, müharibəni başlayan tərəf Rusiya olduğu üçün onu bitirmək məsuliyyəti də Moskvanın üzərinə düşür.
Bundan əvvəl Zelenski Rusiyaya təsir göstərmək və onu sülhə məcbur etmək məqsədilə 40 günlük kampaniyanı təsdiqlədiyini bildirmişdi. Kiyev bu kampaniyanı həm hərbi, həm də diplomatik təzyiq mexanizmi kimi təqdim edir.
Moskva isə hələlik Zelenskinin mümkün görüşlə bağlı son açıqlamasına rəsmi cavab verməyib.
