Yeni Zelandiyada Fələstin məsələsini siyasi gündəmin mərkəzinə çıxarmağı hədəfləyən “Free Palestine” adlı yeni siyasi partiya yaradılıb və rəsmi qeydiyyat üçün müraciət edib.
MSNews.az xəbər verir ki, Yeni Zelandiyanın rəsmi “Seçki Komissiyası”-nın məlumatına görə, “Free Palestine” partiyası ötən həftə qeydiyyat üçün müraciət təqdim edib. Komissiyanın hazırkı müraciətlər siyahısında partiyanın müraciət tarixi 15 iyun 2026-cı il kimi göstərilir və proses hələ baxılma mərhələsindədir.
Qurum qeyd edir ki, siyasi partiyanın qeydiyyatı üzvlük yoxlamaları və partiyanın adı, loqosu ilə bağlı ictimai məsləhətləşmədən sonra müəyyən edilir. Bu isə o deməkdir ki, “Free Palestine” hələ tam rəsmi qeydiyyatdan keçmiş partiya kimi təsdiqlənməyib.
Partiyanın rəsmi “Palestine Free from the River to the Sea Party” saytında bildirilir ki, təşkilat 2026-cı il Yeni Zelandiya parlament seçkilərində müstəqil siyasi qüvvə kimi iştirak etməyi və Fələstin məsələsi üzrə Yeni Zelandiya hökumətinə parlament təzyiqi göstərməyi hədəfləyir.
Partiyanın saytında onun “ədalət, beynəlxalq hüquq və bütün vətəndaşlar üçün bərabər hüquqlara əsaslanan demokratik milli dövlət” ideyasını müdafiə etdiyi qeyd olunur. Platformada həmçinin Yeni Zelandiyanın Fələstinlə bağlı beynəlxalq hüquq və BMT qətnamələri çərçivəsində daha aktiv mövqe tutmalı olduğu vurğulanır.
“The New Arab” nəşrinə müsahibəsində partiya lideri Paul Hopkinson bildirib ki, partiyanın qeydiyyat üçün hüquqi adı “Free Palestine”dir, əsas şüarı isə “Free Palestine from the River to the Sea” ifadəsidir. Onun sözlərinə görə, partiya qeydiyyat prosesi tamamlandıqdan sonra bu şüarı rəsmi ada çevirmək istəyir.
Hopkinson bildirib ki, partiyanın yaradılmasında məqsəd Fələstin məsələsini Yeni Zelandiyada seçki gündəminə çıxarmaq və ölkənin İsrail-Fələstin münaqişəsi ilə bağlı mövqeyinə təsir göstərməkdir. O, mövcud parlament partiyalarını Fələstin məsələsində yetərli addım atmamaqda ittiham edib.
Bununla belə, partiyanın adı və “çaydan dənizə qədər” şüarı artıq mübahisələrə səbəb olub. “The New Arab” yazır ki, bu ifadə mübahisəli hesab olunur və tənqidlər doğurur. Partiya rəhbərliyi isə şüarın İsrailə qarşı nifrət çağırışı deyil, Fələstinlilər üçün bərabər hüquqlar və bir dövlətli həll modelinə dəstək olduğunu bildirir.
Rəsmi qaydalara görə, Yeni Zelandiyada partiyanın ümumi seçkilərdə partiya səsi üzrə iştirak etməsi üçün qeydiyyatdan keçməsi tələb olunur. Seçki Komissiyasının məlumatına əsasən, qeydiyyat üçün partiyanın uyğun adı, seçici kimi qeydiyyatdan keçə bilən 500 ödənişli üzvü, üzvlük qaydaları və auditoru olmalıdır.
Hazırda “Free Palestine” partiyasının müraciəti komissiya tərəfindən nəzərdən keçirilir. Qeydiyyat təsdiqlənəcəyi halda, partiya 2026-cı il seçkilərində Fələstin məsələsini Yeni Zelandiyanın daxili siyasi gündəminə daşımağa çalışan yeni siyasi aktorlardan biri olacaq.
