Almaniya Silahlı Qüvvələri NATO-nun şərq cinahını gücləndirmək üçün Litvada daimi hərbi mövcudluğunu genişləndirir.
MSNews.az xəbər verir ki, “Bundeswehr” Almaniyanın Litvada 5 min nəfərlik ağır manevr briqadası formalaşdırdığını bildirib. Bu yerləşdirmə Rusiyanın Ukraynaya qarşı müharibəsindən sonra NATO-nun şərq cinahında müdafiə və çəkindirmə tədbirlərinin bir hissəsi kimi təqdim olunur.
Litva Müdafiə Nazirliyinin məlumatına görə, Almaniyanın 45-ci zirehli briqadası mərhələli şəkildə Litvaya köçürüləcək. Prosesin əsas hissəsinin 2025-2026-cı illərdə həyata keçirilməsi, briqadanın tam döyüş hazırlığının isə 2027-ci ildə təmin olunması planlaşdırılır.
Briqadanın əsas xidmət məkanlarından biri Rūdninkai hərbi təlim ərazisi olacaq. Nazirlik bildirir ki, təxminən 5 min alman hərbçisi və mülki personalın Litvaya köçürülməsi gözlənilir. Rūdninkai ilə yanaşı, Rukla da briqadanın əsas yerləşmə məkanlarından biri kimi nəzərdə tutulub.
NATO da Almaniya rəhbərliyindəki briqadanın 2027-ci ilə qədər 5 min nəfərə qədər şəxsi heyətlə tam əməliyyat qabiliyyətinə çatacağını qeyd edir. Alyans bu addımı şərq cinahında müdafiə planlarının gücləndirilməsi kontekstində dəyərləndirir.
“WELT” yazır ki, Almaniyanın müdafiə naziri Boris Pistorius briqadanın 2027-ci ilin sonuna qədər tam hazır olacağını bildirib. Onun sözlərinə görə, əsas prinsip könüllülük olsa da, texnika, logistika və xüsusi sahələrdə könüllülər kifayət etməsə, hərbçilərin təyinatla göndərilməsi də mümkündür.
Eyni mənbənin məlumatına görə, hazırda Litvada təxminən 1800 Bundesver nümayəndəsi yerləşir. Briqadanın tam formalaşdırılması Almaniya Silahlı Qüvvələrinin tarixində xaricdə daimi yerləşdirilən ilk belə iri hərbi birləşmə hesab olunur.
