DR Konqonun “canlı heykəl” kimi tanınan məşhur azarkeşi Michel Kuka Mboladinga DÇ-2026-da komandasının ilk oyununu tribunadan izləyə bilməyib.
MSNews.az xəbər verir ki, Mboladinga — azarkeşlər arasında daha çox “Lumumba Vea” kimi tanınır — Afrika Millətlər Kuboku zamanı 90 dəqiqə boyunca hərəkətsiz dayanması ilə dünya mediasının diqqətini çəkmişdi. “Associated Press” yazır ki, o, oyunlar zamanı sağ əlini qaldıraraq Kinşasadakı Patrisa Lumumba abidəsinin pozasını təkrarlayır və bu vəziyyətdə bütün matç ərzində dayanır.
“beIN Sports” onun AFCON-2025-də Botsvana ilə oyunda 90 dəqiqə boyunca tərpənmədən dayanmasını turnirin ən viral görüntülərindən biri adlandırıb. Nəşrin məlumatına görə, bu jest sadəcə azarkeş şousu deyil, Konqonun keçmiş baş naziri, 1961-ci ildə öldürülən Patrisa Lumumbaya simvolik ehtiramdır.
Mboladinga özü AP-yə açıqlamasında bu hərəkətin komandaya güc və enerji vermək məqsədi daşıdığını bildirib. O, Lumumbanı Konqo xalqı üçün azadlıq və milli qürur simvolu adlandırıb.
Lakin “Lumumba Vea” DÇ-2026-da DR Konqonun Portuqaliya ilə ilk oyununda tribunada olmayıb. “Al Jazeera” yazır ki, DR Konqo heyəti ölkədə Ebola epidemiyası ilə bağlı ABŞ-ın tətbiq etdiyi tələblərə görə Avropada 21 günlük izolyasiya dövrü keçirdikdən sonra turnirə yollanıb. Bu proses komandanın hazırlıq planlarına və bəzi nümayəndələrin səfərinə təsir edib.
“AS” nəşri də qeyd edir ki, karantin və giriş qaydaları səbəbindən turnirdə iştirak edə bilməyən simalar arasında DR Konqonun ən xarakterik azarkeşlərindən biri olan Mboladinga da var.
Onun yoxluğuna baxmayaraq, DR Konqo DÇ-2026-ya uğurlu başlayıb. “Reuters” agentliyinin məlumatına görə, komanda Portuqaliya ilə 1:1 hesablı heç-heçə edib və Dünya Kuboku tarixində ilk xalını qazanıb. Konqonun qolunu Yoane Wissa vurub.
Sosial şəbəkələrdə azarkeşlər “Lumumba Vea”nın növbəti oyunlarda tribunaya qayıdacağına ümid edirlər. Bəzi paylaşımlarda onun Kolumbiya ilə matçda komandanı dəstəkləyəcəyi iddia olunsa da, bu məlumat hələlik rəsmi təsdiqini tapmayıb.
