Rusiya prezidenti Vladimir Putinin ölkə daxilində Qərb əleyhinə sərt ritorika yürütməsinə baxmayaraq, onun gizli saxlanıldığı bildirilən övladlarının tərbiyəsində Qərb ölkələrindən olan mürəbbiyə və müəllimlərin iştirak etdiyi iddia olunur.
“Sistema” araşdırma layihəsinin əldə etdiyi sənədlər, müqavilələr, daxili yazışmalar və hesabatlara görə, Putin və keçmiş gimnast Alina Kabayevanın övladları olduğu bildirilən iki uşağın tərbiyəsi üçün son səkkiz ildə ən azı 20 xarici mütəxəssis cəlb edilib. Onların arasında Almaniya, Böyük Britaniya, Avstriya, İrlandiya, Yeni Zelandiya, Kanada və digər ölkələrdən olan müəllim və dayələr yer alıb.
“Radio Free Europe/Radio Liberty” yazır ki, materiallarda söhbət Putinin və Kabayevanın rəsmi şəkildə təsdiqləmədiyi, lakin jurnalist araşdırmalarında onların övladları kimi göstərilən iki oğlandan gedir. Nəşrin məlumatına görə, Putin və Kabayeva nə münasibətlərini, nə də birgə övladlarının olmasını açıq şəkildə təsdiqləyiblər.
Araşdırmaya əsasən, xarici müəllimlərin əsas vəzifələrindən biri uşaqlara erkən yaşlarından ingilis və alman dillərini yüksək səviyyədə öyrətmək olub. Daxili təlimatlarda uşaqların dil səviyyəsinin “təhsilli avropalılar” səviyyəsinə çatdırılmasının hədəfləndiyi bildirilir.
“Sistema”nın məlumatına görə, ailə bu mütəxəssislərin saxlanmasına və xidmətlərinə ildə yüz minlərlə dollar xərcləyib. Bəzi xarici müəllim və dayələrin aylıq maaşlarının 7-8 min dollar səviyyəsinə çatdığı qeyd olunur. İşə götürülən şəxslər rəsmi sənədlərdə çox vaxt “tərcüməçi” kimi rəsmiləşdirilib.
Sənədlərdə Putin və Kabayevanın adlarının birbaşa çəkilmədiyi, onların əvəzinə “ailə”, “valideynlər” və “işəgötürənlər” ifadələrindən istifadə edildiyi bildirilir. Bununla belə, “Sistema” əldə edilən məlumatlarda uşaqların adları, yaşları, yaşayış yerləri və ailəyə yaxın şəxslərlə bağlı detalların əvvəlki araşdırmalarla uyğun gəldiyini yazır.
“Novaya Gazeta Europe” daha əvvəl “Dossier Center” araşdırmasına istinadən Putinin Kabayeva ilə iki oğlunun olduğunu, onların ciddi mühafizə olunan iqamətgahlarda yaşadığını və fərdi müəllimlər tərəfindən təhsil aldığını yazmışdı.
Araşdırmada tərbiyəçilər üçün sərt məhdudiyyətlərin tətbiq edildiyi də qeyd olunur. Müqavilələrdə müəllimlərə uşaqlarla siyasət, din, cinsi tərbiyə və LGBT mövzularını müzakirə etməmək tapşırılıb. Həmçinin xarici işçilərin hərəkət azadlığının məhdudlaşdırıldığı, onların sosial şəbəkələrdə işləri barədə məlumat paylaşmasının qadağan edildiyi və uşaqlarla bağlı gündəlik hesabatlar hazırladıqları bildirilir.
“Sistema” sənədlərin saxtalaşdırılmasına dair açıq əlamət aşkarlanmadığını bildirir. Bununla yanaşı, araşdırmada sənədlərin tam autentikliyindən mütləq əminliklə danışmağın çətin olduğu da qeyd edilir. Kremlin sözçüsü Dmitri Peskov və Kabayevanın nümayəndələri jurnalistlərin sorğularına cavab verməyiblər.
Araşdırma Rusiya hakimiyyətinin Qərbə qarşı sərt ideoloji ritorikası fonunda xüsusi diqqət çəkib. Çünki Putinin ictimai çıxışlarında Qərb dəyərləri tez-tez tənqid olunsa da, iddialara görə, onun ailəsində uşaqların təhsil və tərbiyə sistemində məhz Qərb ölkələrindən olan mütəxəssislərə üstünlük verilib.
