İspaniya qadın futbolunun ən böyük simalarından biri, “Barselona”nın kapitanı Aleksiya Putelyas mövsümün sonunda Kataloniya klubundan ayrılacaq.
“Barca Blaugranes”in məlumatına görə, klub əfsanəvi futbolçunun 14 illik “Barselona” karyerasının başa çatacağını təsdiqləyib və onun üçün xüsusi vida mərasimi təşkil olunacaq.
Putelyas 2012-ci ildən “Barselona”nın qadın komandasında çıxış edir və bu müddətdə klubun ən böyük simvollarından birinə çevrilib. “Barselona”nın rəsmi saytında apreldə dərc olunan məlumatda Putelyasın 500-cü oyununa çıxdığı, klub tarixinin ən çox qol vuran qadın futbolçusu olduğu və həmin vaxtadək 35 mükafat qazandığı qeyd olunmuşdu.
Kataloniya klubunun məlumatına görə, Putelyas həm də “Barselona” tarixində iki dəfə “Qızıl top” qazanan qadın futbolçu kimi xüsusi yer tutur. O, 2021 və 2022-ci illərdə “Ballon d’Or Féminin” mükafatına layiq görülüb. Klub onu qadın futbolunda bütöv bir dövrü müəyyən edən oyunçulardan biri kimi təqdim edir.
Putelyas “Barselona” ilə birlikdə İspaniya çempionluqları, ölkə kubokları, Superkuboklar və UEFA Qadınlar Çempionlar Liqası titulları qazanıb. “Barselona” 2025/2026 mövsümündə də Avropada zəfər yaşayaraq “Olimpik Lion”-u 4:0 məğlub edib və Putelyas bu turnirin ən yaxşı oyunçusu seçilib.
Son həftələrdə futbolçunun gələcəyi ilə bağlı müxtəlif iddialar yayılırdı. “Sky Sports” yazır ki, Putelyasın “Barselona”dan ayrılacağı gözlənilir və onun İngiltərə Qadınlar Superliqasına mümkün keçidi də müzakirə olunur. Bununla belə, 32 yaşlı yarımmüdafiəçinin yeni klubu hələ rəsmən açıqlanmayıb.
