Ermənistanın Baş naziri Nikol Paşinyan seçki kampaniyası zamanı Qarabağdan olan keçmiş separatçı çevrələr və müxalifət liderləri barədə kəskin ifadələr işlədib. Ermənistan mediasında və Azərbaycan mətbuatında yayılan görüntülərə görə, Paşinyan İrəvanda kampaniya tədbiri zamanı Qarabağdan olan Artur Osipyan adlı şəxsin etirazı ilə üzləşib və bundan sonra emosional çıxış edib.
MSNews.az-ın yaydığı videomaterialda Paşinyanın Qarabağdan olan keçmiş siyasi dairələri “yalançı elita” adlandırdığı bildirilir.
Paşinyan çıxışında Qarabağ ermənilərinin keçmiş rəhbər dairələrini ittiham edərək onların Qarabağ əhalisini “girov saxladığını” deyib. O, həmçinin separatçı rejimin keçmiş rəhbəri Samvel Şahramanyanın və həmin çevrələrə bağlı şəxslərin 2023-cü ildə baş verən hadisələrdən sonra niyə məsuliyyət daşımadıqlarını sorğulayıb.
Məlumata görə, Paşinyan çıxışında Ermənistanın keçmiş prezidentləri Robert Köçəryan və Serj Sarkisyanı, iş adamı Samvel Karapetyanı, eləcə də “Çiçəklənən Ermənistan” Partiyasının lideri Qaqik Tsarukyanı hədəfə alıb. Paşinyan onların ailə üzvləri və siyasi çevrələri barədə də sərt ifadələr işlədib, bu qrupları Qarabağ məsələsindən siyasi alət kimi istifadə etməkdə ittiham edib.
Hadisə Ermənistanda iyunun 7-də keçiriləcək parlament seçkiləri ərəfəsində siyasi mübarizənin daha da sərtləşdiyi vaxta təsadüf edir. Seçkilərdə Paşinyanın rəhbərlik etdiyi, Qərblə daha yaxın münasibətləri müdafiə edən “Vətəndaş Müqaviləsi” Partiyası əsasən Rusiyaya yaxın müxalif qüvvələrlə rəqabət aparır. Ermənistan müxalifətində keçmiş prezidentlərlə əlaqəli və Rusiyaya yaxın qruplar üstünlük təşkil edir.
Qarabağ mövzusu seçki kampaniyasının əsas siyasi xəttlərindən birinə çevrilib. Azərbaycan 2023-cü ildə Qarabağ üzərində tam nəzarəti bərpa etdikdən sonra bölgədə yaşayan ermənilərin böyük hissəsi Ermənistana köçüb. Paşinyan isə son aylarda Qarabağ məsələsinin Ermənistan siyasətində bağlanmalı olduğunu və Azərbaycanla sülh gündəliyinin irəli aparılmasını müdafiə edir.
Qaqik Tsarukyan Paşinyanın sərt ritorikasına cavab olaraq siyasi təhqir və təhdid üslubuna qoşulmaq istəmədiyini bildirib. NEWS.am-ın məlumatına görə, Tsarukyan jurnalistlərə açıqlamasında “xalq hər kəsi gördüyü işlərə görə qiymətləndirməlidir” deyib və Paşinyan hakimiyyətinin son səkkiz ildə hansı nəticələr əldə etdiyini sorğulayıb.
