Argentina millisinin və Madrid “Atletiko”sunun hücumçusu Xulian Alvares 14 yaşlı argentinalı bərbər Qael Baxonun arzusunu yerinə yetirib. Gənc bərbər bir müddət əvvəl yerli televiziya və sosial şəbəkələrdə ən böyük arzusunun Alvaresin saçını kəsmək olduğunu demişdi. Onun hekayəsi qısa müddətdə viral olub və futbolçunun diqqətini çəkib.
MSNews.az xəbəri “News Digitales” nəşrinə istinadən təqdim edir.
Qael valideynlərinin evində kiçik bərbərxana açıb və müştərilərini orada qəbul edir. Argentina mediasının məlumatına görə, o, uşaq yaşlarından qazandığı pulu yığıb öz işinə sərmayə qoyub, bərbərlik alətlərini alıb və kiçik yaşına baxmayaraq şəxsi müştəri bazası formalaşdırıb.
Hekayə influenser Naçanonun çəkdiyi video ilə geniş yayılıb. Videoda Qael ən böyük arzusunun “Atletiko”nun argentinalı hücumçusunun saçını kəsmək olduğunu bildirib. Bundan sonra minlərlə istifadəçi Alvaresi sosial şəbəkələrdə işarələyib. Futbolçu əvvəlcə paylaşımı şərh edərək Argentinaya qayıdanda görüşə biləcəklərini yazıb, daha sonra isə Qaelə şəxsi mesaj göndərərək onu ruhlandırıb.
Lakin Alvaresin yaxın vaxtlarda Argentinaya qayıtması planlaşdırılmadığı üçün görüş Madridə daşınıb. Sponsorların və hekayəni izləyən insanların dəstəyi ilə Qael İspaniyaya səfər edib və viral videodan cəmi 23 gün sonra arzusuna çataraq Alvaresin saçını kəsib.
Görüş emosional anlarla yadda qalıb. Argentina mediası yazır ki, Qael Madridə səfər zamanı Alvareslə görüşüb, onun saçını kəsib, futbolçu isə gənc bərbərə imzalı “Atletiko” forması hədiyyə edib. Bu jest azarkeşlər tərəfindən Alvaresin sadəliyi və insanlığı kimi qiymətləndirilib.
