Polşalı futbolçu Oskar Pietuşevski bir neçə gün ərzində həm futbol, həm də təhsil həyatı ilə gündəmə gəlib. 17 yaşlı futbolçu həftəsonu “Portu” ilə Portuqaliya çempionluğunu qeyd etdikdən sonra Polşaya qayıdaraq Bialistokda buraxılış imtahanlarına qatılıb.
“RMF24”-ün məlumatına görə, Pietuşevski mayın 4-də polyak dili üzrə ilk “matura” imtahanını verib.
Gənc futbolçu imtahandan sonra jurnalistlərə açıqlamasında təhsilini yarımçıq qoymaq fikrində olmadığını bildirib. O, Portuqaliyaya köçməsinə baxmayaraq, imtahanlara fərdi şəkildə hazırlaşdığını və müəllimləri ilə əlaqə saxladığını deyib. Pietuşevski polyak dili imtahanından əvvəl bir qədər həyəcanlandığını, lakin nəticəyə ümidli olduğunu söyləyib.
“Radio Białystok”-un məlumatına görə, futbolçu ən çox polyak dili imtahanından çəkindiyini bildirib və bu fənnin hazırlıq baxımından vaxt tələb etdiyini qeyd edib. Buna baxmayaraq, imtahandan sonra “ən çətini artıq geridə qaldı” deyərək növbəti mərhələlərə daha nikbin yanaşıb.
Pietuşevski həftəsonu “Portu”nun heyətində Portuqaliya çempionluğunu bayram edib. “PortuGOAL” yazır ki, “Portu” 2025/26 mövsümündə Portuqaliya çempionu olub və bu, klubun dörd ildən sonra ilk liqa tituludur. Gənc polşalı futbolçu qış transferindən sonra komandanın diqqət çəkən oyunçularından biri kimi göstərilir.
“RMF24”-ün məlumatında qeyd olunur ki, “Portu” çempionluğu “Alverka” üzərində 1:0 hesablı qələbə ilə rəsmiləşdirib, qalibiyyət qolunu isə digər polşalı futbolçu Yan Bednarek vurub. Pietuşevski isə bildirib ki, titul qazanmaq onun üçün böyük uğur olsa da, hazırda diqqətini təhsilə və qarşıdakı imtahanlara yönəldib.
