ABŞ Prezidenti Donald Tramp “Project Freedom” adlı yeni təşəbbüs elan edib. Plana əsasən, ABŞ mayın 4-dən etibarən Hörmüz boğazında qalan xarici gəmilərin təhlükəsiz şəkildə ərazidən çıxarılmasına yardım etməyə başlayacaq. Tramp bu addımı münaqişədə iştirak etməyən ölkələrin gəmilərinə dəstək məqsədi daşıyan “humanitar jest” kimi təqdim edib.
MSNews.az xəbəri “Reuters”-ə istinadən verir.
Trampın sözlərinə görə, bir sıra ölkələr Vaşinqtona müraciət edərək boğazda “kilidlənmiş” gəmilərinin təhlükəsiz keçidi üçün kömək istəyib. ABŞ lideri bildirib ki, məqsəd həmin gəmilərin regiondan çıxarılması və normal kommersiya fəaliyyətinə qayıtmasıdır. Əməliyyatın bazar ertəsi səhər, Yaxın Şərq vaxtı ilə başlanacağı açıqlanıb.
ABŞ Prezidenti eyni zamanda xəbərdarlıq edib ki, təşəbbüsə hər hansı müdaxilə güc tətbiqi ilə cavablandırılacaq. Bununla belə, Ağ Ev və Pentaqon əməliyyatın dəqiq mexanizmi, ABŞ Hərbi Dəniz Qüvvələrinin hansı formada iştirak edəcəyi və neçə gəminin müşayiət olunacağı barədə hələlik ətraflı açıqlama verməyib.
Hörmüz boğazı dünya enerji ticarətinin ən həssas keçidlərindən biri hesab olunur. ABŞ-İran qarşıdurması fonunda bu marşrutda gərginliyin artması qlobal ticarət, neft daşımaları və gəmiçilik təhlükəsizliyi üçün ciddi risklər yaradıb. “Associated Press”-in məlumatına görə, İran hazırda ABŞ-ın sülh təklifinə cavabı nəzərdən keçirir, lakin Tehran Hörmüz boğazına nəzarət məsələsində geri çəkilmək niyyətində olmadığını bildirir.
Bu addım Vaşinqtonun Hörmüz boğazında daha aktiv rol almağa hazır olduğunu göstərir. Tramp administrasiyası təşəbbüsü neytral ölkələrin gəmilərinə yardım kimi təqdim etsə də, “Project Freedom” ABŞ və İran arasında onsuz da gərgin olan hərbi-siyasi vəziyyəti daha da həssas mərhələyə keçirə bilər.
