Ukrayna Prezidenti Volodimir Zelenski Belarusla sərhəddə “kifayət qədər spesifik aktivlik” qeydə alındığını bildirib. O, mayın 2-də videomüraciətində qeyd edib ki, Ukrayna tərəfi vəziyyəti diqqətlə izləyir və lazım gələrsə, cavab verəcək.
MSNews.az xəbəri “Ukrainska Pravda” nəşrinə istinadən verir.
Ukrayna monitorinq kanallarının məlumatına görə, sərhədə yaxın ərazidə iki Belarus hərbi helikopteri müşahidə olunub. İddialara əsasən, helikopterlər Kiyev və Çerniqov vilayətləri ilə sərhəddən təxminən 2–3 kilometr məsafədə uçublar. Bununla belə, bu məlumatın rəsmi şəkildə təsdiqlənmədiyi bildirilir.
Zelenski insidenti “spesifik aktivlik” kimi qiymətləndirərək bildirib ki, Ukrayna öz xalqını və suverenliyini müdafiə etməyə hazırdır. Onun sözlərinə görə, Ukraynaya qarşı istənilən aqressiv fəaliyyətə cəlb edilməyə çalışılan hər kəs bunu nəzərə almalıdır.
Hadisə Belarus istiqamətində gərginliyin artdığı dövrə təsadüf edir. Zelenski daha əvvəl də Rusiyanın Belarusu yenidən Ukraynaya qarşı müharibəyə cəlb etməyə çalışdığını bildirmişdi. “Reuters” mart ayında yazırdı ki, Ukrayna kəşfiyyatına görə, Rusiya Belarus ərazisində uzaqmənzilli dronlar üçün yerüstü idarəetmə stansiyaları yaratmağı planlaşdırır.
“Associated Press”-in məlumatına görə, Belarus Rusiyaya dəstək verməyə davam edir, ölkə ərazisi müharibənin əvvəlindən Rusiya qüvvələri üçün dayaq məkanı kimi istifadə olunub və burada Rusiya taktiki nüvə silahları da yerləşdirilib. Hazırda Kiyev sərhəddəki vəziyyəti nəzarətdə saxladığını bildirir.
