ABŞ-da İranla bağlı hərbi planların yenidən gündəmə gəldiyi bildirilir. “Axios”un məlumatına görə, ABŞ Mərkəzi Komandanlığı — CENTCOM İran hədəflərinə qarşı “qısa və güclü” zərbə dalğası variantı hazırlayıb. Planın əsas məqsədinin Tehranı danışıqlar masasına qaytarmaq və nüvə proqramı ilə bağlı daha çevik mövqe tutmağa məcbur etmək olduğu qeyd olunur.
Məlumata əsasən, ABŞ Prezidenti Donald Trampa yeni hərbi variantlarla bağlı brifinq keçirilməsi planlaşdırılıb. Brifinqdə CENTCOM komandanı admiral Bred Kuper, müdafiə naziri Pit Heqset və Qərargah Rəisləri Komitəsinin sədri general Den Keynin iştirak edəcəyi bildirilir. “Reuters” yazır ki, müzakirə olunacaq variantlar arasında İran infrastrukturuna zərbələr və Hörmüz boğazında kommersiya gəmiçiliyinin bərpası üçün əlavə hərbi addımlar da var.
Bununla belə, açıq mənbələrdə Pentaqonun məhz, İranın bütün nüvə obyektlərinə qarşı “qətiyyətli əməliyyat” planını tamamladığı rəsmi şəkildə təsdiqlənmir. ABŞ administrasiyası isə ümumi mövqeyini dəyişməyib: Ağ Ev bildirir ki, Prezident Tramp İranın nüvə silahına sahib olmasına imkan verilməyəcəyini açıq şəkildə bəyan edib və danışıqlar ABŞ-ın milli təhlükəsizlik maraqları çərçivəsində davam edir.
Məsələ İranla ABŞ arasında kövrək atəşkəs və Hörmüz boğazı ətrafında gərginlik fonunda gündəmə gəlib. “Reuters”-in məlumatına görə, ABŞ administrasiyası aprelin əvvəlində başlayan atəşkəsin iki tərəf arasında aktiv hərbi əməliyyatları dayandırdığını bildirir, lakin Konqresdə bəzi demokratlar bu yanaşmanı mübahisələndirirlər.
ABŞ-ın İran nüvə obyektlərinə əvvəlki zərbələri də regional eskalasiya riskini artırmışdı. ABŞ daha əvvəl Fordo, İsfahan və Natanz obyektlərini hədəfə almış, Tramp isə İran sülhə razılaşmasa, “başqa hədəflərin” də vurula biləcəyini bildirmişdi. İran tərəfi həmin hücumlardan sonra radioaktiv çirklənmə qeydə alınmadığını açıqlamışdı.
Hazırkı mərhələdə Vaşinqtonun məqsədi İranı nüvə proqramı üzrə güzəştə məcbur etmək kimi təqdim olunur. Lakin hərbi variantların yenidən müzakirəyə çıxarılması Yaxın Şərqdə daha genişmiqyaslı qarşıdurma riskini artıran amil kimi qiymətləndirilir.
