MSNews.az olaraq belə insanlardan biri haqqında qısa material hazırladıq. Söhbət uzun illərdir Böyük Britaniyada yaşayan həmyerlimiz Eltən xanımdan gedir.
Eltən xanımla ilk ünsiyyətimiz “Facebook” üzərindən baş tutmuşdu. Açığı, onun sosial şəbəkədə istifadə etdiyi “El Azazelle” adı ilk andan diqqətimizi çəkmişdi. Daha sonra paylaşımlarına nəzər saldıqca gördük ki, bu adın arxasında yalnız fərqli bir obraz deyil, həm də öz köklərinə bağlı, mədəniyyətini müxtəlif formada ifadə etməyə çalışan bir azərbaycanlı dayanır. Məhz, bu səbəbdən qərara gəldik ki, bu həmyerlimizi oxucularımıza daha yaxından tanıdaq.
– Eltən xanım, ilk olaraq, belə bir sual verək: “El Azazelle” adı nəyi ifadə edir? Bu adın arxasında hansı məna dayanır?
– “Azazelle” adı mənim üçün sadəcə bir ad deyil, daha çox bir simvoldur. O, daxili transformasiyanı, insanın köhnə “mən”indən çıxaraq yeni bir versiyasına keçidini təmsil edir. “El” isə bu ada kimlik və ifadə forması kimi əlavə olunub. Yəni bu ad mənim yaradıcılığımın, düşüncə tərzimin və daxili axtarışlarımın birləşməsidir. Açıq desəm, “bu ad mənim üçün sadəcə səsləniş deyil, bütöv bir daxili yolun simvoludur.”
– Özünüz haqqında danışardınız.
– Mən 2010-cu ilin oktyabrında Böyük Britaniyaya köçmüşəm və o vaxtdan bəri burada yaşayıram. Peşəkar həyat yolum kifayət qədər müxtəlif olub. Müxtəlif dövrlərdə dəmir yolu mühəndisi, təcili yardım xidməti əməkdaşı və data elmi sahəsində çalışmışam. Son illərdə isə tamamilə kontent yaradıcılığına keçmişəm. Bununla yanaşı, kitab müəllifiyəm və şahmat ustasıyam. Məncə, bütün bu fərqli sahələr mənim dünyaya baxışımı daha da genişləndirib. “Həyatım həmişə fərqli istiqamətlərin kəsişməsində keçib və bu da yaradıcılığıma birbaşa təsir edib.”
– Kitab müəllifi?
– Bəli, mənim spiritual mövzulara aid 9 rəqəmsal kitabım, həmçinin uşaqlar üçün mifoloji hekayələrdən ibarət və “Amazon” platformasında yayımlanan 33 rəqəmsal kitabım var.
– Azərbaycan haqqında kontent yaratmağa sizi nə vadar edir?
– Azərbaycan mənim vətənimdir və mən onu harada olsam da özümlə daşıyıram. Dünyanın onun tarixini, mifologiyasını, mənəvi ənənələrini və dərinliyini tanımasını istəyirəm. Çünki Azərbaycanın regionun ən zəngin və çoxqatlı mədəni tarixlərindən birinə sahib olduğunu düşünürəm, amma dünya bunun haqqında çox az şey bilir. Hər dəfə beynəlxalq auditoriyama Azərbaycanla bağlı bir hekayə təqdim edəndə, bunu məni formalaşdıran torpağa bir dönüş kimi hiss edirəm. “Azərbaycanı anlatmaq mənim üçün sadəcə kontent deyil, mənə kimlik verən torpağa nəsə qaytarmaq hissidir.”
– Kontentiniz əsasən hansı mövzuları əhatə edir?
– Kontentim əsasən okkult və ezoterik ənənələrə, gizli tarixə, mifologiyaya və qədim sivilizasiyaların mənəvi qatlarına yönəlir. Bu çərçivədə Azərbaycan hekayələrinə, mifologiyasına və tarixi şəxsiyyətlərinə də mütəmadi olaraq yer verirəm. Mən istəyirəm ki, dünya Azərbaycanı sadəcə xəritədə bir ölkə kimi yox, dərin mənəvi və tarixi qatlara malik bir mədəniyyət kimi tanısın. “Azərbaycanı dərinlik və əhəmiyyət prizmasından göstərmək mənim üçün çox vacibdir.”
– Amma görünür, kontentiniz təkcə Azərbaycanla məhdudlaşmır.
– Bəli, tamamilə doğrudur. Mənim kontentim dünyanın bütün ölkələrinə, fərqli mədəniyyətlərə və xalqlara aiddir. Buna görə də məni hər ölkədən insanlar izləyir. Mən bir növ dünya mədəniyyətləri, tarixi və mənəvi irsi haqqında danışan, araşdıran və paylaşan bir yaradıcıyam. Sadəcə, zaman-zaman Azərbaycan haqqında da videolar və musiqilər hazırlayıram, çünki insanlar mənim haradan gəldiyimi maraqla soruşurlar. Mən də bunu fürsətə çevirib vətənimi tanıdıram. Bir az zarafatla desəm, “mən, əslində, bütün ölkələr haqqında müəllimlik edirəm.” 😁
– Musiqi yaradıcılığınızda Azərbaycan elementlərinə də yer verirsiniz. Bu barədə nə deyə bilərsiniz?
– Bəli, mən Azərbaycan etnik elementlərini də musiqimə daxil etmişəm. Xüsusilə, balaban və ya düdük (tütək) kimi ənənəvi alətlərdən, eləcə də muğam elementlərindən ilham alıram. Mənim üçün maraqlı olan qədim səsi müasir ifadə ilə birləşdirməkdir. Yəni həm kökü qorumaq, həm də onu bugünkü auditoriyaya yeni formada çatdırmaq. “Mən qədim səsi müasir ifadə ilə birləşdirməyə çalışıram.”
– Azərbaycana sonuncu dəfə nə vaxt gəlmisiniz? Yenidən qayıtmaq planınız varmı?
– Vətəndə sonuncu dəfə bir neçə il əvvəl olmuşam. Açığı, Azərbaycan mənim üçün həmişə çox xüsusi yer olaraq qalır. Oraya qayıtmaq, həm ailəmi görmək, həm də o enerjini yenidən hiss etmək istəyim var. Düşünürəm ki, uyğun vaxt və şərait yaranan kimi mütləq yenidən ziyarət edəcəyəm. “Azərbaycan mənim üçün heç vaxt uzaq bir yer olmayıb, sadəcə bir müddət fiziki olaraq ondan kənarda yaşamışam.”
– Sonda, ən böyük arzunuz nədir?
– Ən böyük arzum dünyaya sülhə töhfə verməkdir. Hətta bunu bir az gülərək, amma tam səmimi şəkildə belə deyirəm: “Arzum Nobel Sülh Mükafatıdır.”
Qeyd edək ki, Eltən xanım demək olar ki, bütün əsas sosial media platformalarında — “Facebook”, “Instagram”, “TikTok” və “YouTube”da aktivdir. O, bu platformaların hər birində geniş auditoriyaya sahibdir və paylaşımları ilə kifayət qədər izləyici kütləsi toplaya bilib.
