BƏƏ Prezidenti Məhəmməd bin Zayed Al Nəhyanın diplomatik müşaviri Ənvər Qarqaş ölkəsinin yayınmağa çalışdığı müharibədə “qalib gəldiyini” bəyan edib.
O, sosial şəbəkədə yazıb ki, BƏƏ “səmimi şəkildə qaçmağa çalışdığı müharibədə qalib gəlib” və bunu suverenliyi, ləyaqəti və əldə olunan nailiyyətləri qoruyan “genişmiqyaslı milli müdafiə” sayəsində bacarıb.
Xəbəri “The National” nəşrinə istinadən MSNews.az verir.
Qarqaş bildirib ki, Əbu-Dabi bundan sonra regiondakı mürəkkəb vəziyyəti “daha böyük rıçaq, daha kəskin baxış və gələcəyi formalaşdırmağa daha möhkəm təsir imkanları” ilə idarə etməyə çalışacaq. Onun sözlərinə görə, cəmiyyətin gücü, dözümlülüyü və möhkəmliyi BƏƏ-nin “intibah modelini” daha da gücləndirib.
Bu açıqlama ABŞ və İran arasında iki həftəlik şərti atəşkəsin elan olunmasından sonra səslənib. Razılaşma Hörmüz boğazının yenidən açılması ilə əlaqələndirilir və regionda gərginliyi azaltmaq üçün müvəqqəti diplomatik pəncərə yaradır.
Qarqaş bundan əvvəl də bildirmişdi ki, ABŞ-İran qarşıdurması ilə bağlı istənilən həll Hörmüz boğazından sərbəst keçidi təmin etməlidir. O, boğazın heç bir dövlət tərəfindən “girov saxlanıla bilməyəcəyini” vurğulamış və BƏƏ-nin gəmiçiliyin təhlükəsizliyini təmin edəcək beynəlxalq səylərə qoşulmağa hazır olduğunu demişdi.
