Tailand parlamentində yeni baş nazirin seçilməsi üçün səsvermə başlayıb. Müvəqqəti hökumət başçısı və Bhumcaytay Partiyasının lideri Anutin Çarnvirakul yenidən hökumət qurmaq üçün mandat əldə etməyə çalışır.
MSNews.az-ın məlumatına görə, Anutinin rəhbərlik etdiyi koalisiya parlamentdəki 499 yerdən 292-ni nəzarətdə saxlayır ki, bu da ona baş nazir seçilməsi üçün lazım olan minimum 251 səs baryerini aşmaq imkanı yaradır.
Onun əsas rəqibi Xalq Partiyasının lideri Natthafonq Ruenqpanyavutdur. Lakin onun parlamentdəki dəstəyi hələlik qeyri-müəyyən olaraq qalır.
Anutin parlamentdə çıxışında bildirib ki, hökumət qısa müddətdə formalaşdırılacaq və ölkənin üzləşdiyi iqtisadi problemlərin həlli üçün proqram təqdim ediləcək.
Analitiklər hesab edir ki, Anutinin qələbəsi uzun illər siyasi qeyri-sabitlik yaşayan Tailandda nisbətən sabitlik dövrü yarada bilər. Onun rəhbərlik etdiyi Bhumcaytay Partiyası son seçkilərdə gözlənilmədən güclü nəticə göstərərək siyasi səhnədə mövqeyini möhkəmləndirib.
Bununla yanaşı, ölkə ciddi iqtisadi çətinliklərlə üzləşir. Yüksək borclanma səviyyəsi, struktur islahatlara ehtiyac və qlobal ticarət qeyri-müəyyənliyi yeni hökumət üçün əsas çağırışlar kimi qiymətləndirilir.
Ekspertlərin fikrincə, Anutinin siyasi balansı qorumaq bacarığı və müxtəlif güc mərkəzləri ilə işləmə təcrübəsi onun əsas üstünlüklərindən biri hesab olunur.
