Qəzzada atəşkəs razılaşması çərçivəsində yaradılan Qəzza İdarəetməsi üzrə Milli Komitə (NCAG) bölgədə yeni polis qüvvəsinin formalaşdırılacağını açıqlayıb.
Komitənin “X” sosial şəbəkə platformasındakı rəsmi hesabında yayımlanan bəyanatda bildirilib ki, Qəzza uzun illər davam edən İsrail hücumları, dağıntılar və ağır humanitar şəraitə baxmayaraq, xalqına xidmət etməyə hazır olan və yenidənqurma prosesini idarə edə biləcək bacarıqlı fələstinlilərə malikdir.
Açıqlamada qeyd olunub ki, komitə peşəkar, hesabatlı, şəffaf və ləyaqət prinsiplərinə əsaslanan polis qüvvəsi yaratmağı hədəfləyir. Polis orqanlarında xidmət etmək istəyən ixtisaslı qadın və kişilər üçün müraciət prosesinin açıq olacağı vurğulanıb.
Bəyanatda həmçinin İsrail hücumları dövründə bombardman və məcburi köçürülmə kimi ağır şərtlər altında fəaliyyət göstərən mövcud polis əməkdaşlarının xidmətlərinin yüksək qiymətləndirildiyi bildirilib. Qarşıdakı mərhələdə isə polis qüvvəsinin gücləndirilməsi və peşəkarlıq səviyyəsinin daha da artırılmasının vacibliyi qeyd olunub.
Komitənin bu addımı atəşkəs sonrası dövrdə təhlükəsizlik və idarəetmə mexanizmlərinin formalaşdırılması istiqamətində mühüm mərhələ kimi qiymətləndirilir.
