“Reuters”/”Ipsos” tərəfindən keçirilən yeni rəy sorğusu göstərir ki, amerikalıların əksəriyyəti maliyyəçi və məhkum edilmiş cinayətkar Ceffri Epşteyn ilə bağlı yayımlanan sənədlərin ABŞ-da güclü və varlı şəxslərin nadir hallarda məsuliyyətə cəlb edildiyini ortaya qoyduğuna inanır.
Dörd gün davam edən sorğunun nəticələrinə əsasən, respondentlərin 69 faizi “Epşteyn sənədləri ABŞ-da güclü insanların əməllərinə görə nadir hallarda cavab verdiyini göstərir” fikrinin onların baxışlarını “çox yaxşı” və ya “son dərəcə yaxşı” əks etdirdiyini bildirib. Daha 17 faiz bu fikrin mövqelərini “qismən” ifadə etdiyini deyib.
Həm Respublikaçılar, həm də Demokratlar arasında respondentlərin 80 faizindən çoxu bu fikirlə ən azı qismən razı olduqlarını bildirib.
ABŞ Ədliyyə Nazirliyi Konqresin göstərişi ilə Epşteynin siyasət, maliyyə, akademiya və biznes dairələrində tanınmış şəxslərlə əlaqələrini əks etdirən milyonlarla sənədi açıqlayıb. Epşteyn 2008-ci ildə yetkinlik yaşına çatmayan qızla bağlı fahişəliyə cəlbetmə ittihamı üzrə təqsirli bilinmişdi. O, 2019-cu ildə azyaşlıların cinsi istismarı ittihamı ilə həbs edildikdən sonra Manhettendəki həbsxanada intihar edib.
Məsələ ABŞ Prezidenti Donald Tramp üçün də siyasi təzyiq mənbəyinə çevrilib. Tramp 1990–2000-ci illərdə Epşteyn ilə sosial münasibətlərinin olduğunu təsdiqləsə də, onun cinayətlərindən xəbərsiz olduğunu və 2000-ci illərin əvvəllərində əlaqələri kəsdiyini bildirib.
Sənədlərin açıqlanmasından sonra bəzi iri şirkətlərdə istefalar baş verib. O cümlədən “Goldman Sachs” və “Hyatt Hotels” rəhbərliyində dəyişikliklər olub.
Sənədlərdə ABŞ-ın ticarət naziri Hovard Latnik və səhiyyə rəsmisi Mehmet Öz ilə bağlı yazışmalar da yer alır. Hər iki şəxsə qarşı hər hansı hüquqi ittiham irəli sürülməyib.
Sorğuda iştirak edən Respublikaçıların 67 faizi ölkənin artıq Epşteyn məsələsini gündəmdən çıxarmalı olduğunu düşünür. Demokratlar arasında isə bu fikirlə razılaşanların payı cəmi 21 faizdir.
Onlayn formatda, ölkə üzrə 1117 yetkin şəxsin iştirakı ilə keçirilən sorğunun statistik xəta payı 3 faiz bəndi təşkil edir.
