İşğal altındakı Qərbi Şəriənin cənubunda yerləşən El-Həlil şəhəri yaxınlığındakı Mesafir Yatta bölgəsində Oskar mükafatlı (“No Other Land”) fələstinli rejissor Həmdan Ballalın ailəsi israilli hərbçilər və yəhudi məskunlaşanların hücumuna məruz qalıb. Hadisə fələstinlilərin bölgədə davam edən torpaq mübarizəsi fonunda baş verib.
Məlumata görə, “No Other Land” sənədli filminin rejissorlarından olan Ballalın ailəsinə hücum məskunlaşanların çağırdığı İsrail əsgərləri tərəfindən həyata keçirilib. Rejissorun qardaşı Məhəmməd Ballal və ailə üzvlərinin döyüldüyü bildirilir.
Həmdan Ballalın sözlərinə görə, hadisə bazar günü baş verib. O bildirib ki, məskunlaşanlar qoyun otarmaq bəhanəsi ilə evlərinin yaxınlığına gəlib, daha sonra İsrail hərbçilərini çağırıblar. Əsgərlər məskunlaşanlarla danışdıqdan sonra qardaşından şəxsiyyət vəsiqəsi tələb ediblər. Rejissorun iddiasına əsasən, qardaşı sənədi evdən gətirə biləcəyini desə də, hərbçilər onun boğazını sıxıb və o, bir müddət nəfəs ala bilməyib. Ballal qeyd edib ki, qardaşı həmin an öləcəyini düşündüyünü deyib və vəziyyəti ağırlaşdığından xəstəxanaya aparılıb.
Onun sözlərinə görə, tibbi müdaxilədən və oksigen dəstəyindən sonra Məhəmməd özünə gəlib. Lakin hadisədən sonra əsgərlər yenidən gələrək iki qardaşı və bir əmioğlunu saxlayaraq Susya hərbi məntəqəsinə aparıblar. Onların üç saat ərzində əlləri arxadan qandallı və gözləri bağlı saxlanıldığı, daha sonra isə təhlükəli hesab edilən yolda sərbəst buraxıldığı bildirilir.
Ballal ailəsinin son dövrlər məskunlaşanların davamlı təzyiq və təhdidləri ilə üzləşdiyini deyib. Onun sözlərinə görə, tez-tez evlərinin yaxınlığına gələn şəxslər “ərazini tərk etməsəniz, gecə gəlib evi dağıdacağıq” kimi hədələr səsləndirirlər. Rejissor ailəsinin beynəlxalq ictimaiyyətə bölgədəki vəziyyəti çatdırdığı üçün hədəf seçildiyini düşünür.
Hücuma məruz qalan Məhəmməd Ballal da sistematik zorakılıqla üzləşdiklərini bildirib. O, əsgərin silahını çıxararaq ona atəş açmağa cəhd etdiyini iddia edib və bədənində xəsarət izləri olduğunu, tibbi arayış aldığını vurğulayıb.
Mesafir Yatta bölgəsi uzun müddətdir ki, dağıntı və köçürmə siyasəti ilə gündəmdədir. 2025-ci ildə “No Other Land” filmi işğal altındakı ərazilərdə fələstinlilərin yaşadığı çətinlikləri sənədləşdirdiyinə görə “Ən yaxşı sənədli film” nominasiyasında Oskar mükafatına layiq görülmüşdü.
Hadisə bölgədə onsuz da gərgin olan təhlükəsizlik vəziyyətinin daha da mürəkkəbləşdiyini göstərir. Beynəlxalq hüquq müdafiə təşkilatları Qərbi Şəriədə mülki əhaliyə qarşı zorakılıq hallarının araşdırılması və məsul şəxslərin cavabdehliyə cəlb olunması ilə bağlı çağırışlar edir.
