Mark Zukerberq artıq ənənəvi şəxsi köməkçi axtarmaq əvəzinə, özünə süni intellekt əsaslı köməkçi yaratmağa başlayıb.
Məlumata görə, “Meta” rəhbərinin hazırladığı bu sistem onun gündəlik işlərini asanlaşdırmaq, məlumatlara daha sürətli çıxış əldə etmək və qərarvermə prosesini sürətləndirmək məqsədi daşıyır. Sistem artıq ilkin mərhələdə “on-demand” məlumat aləti kimi işləyir və rəhbər səviyyəsində informasiyaya çıxışdakı gecikmələri aradan qaldırır.
Zukerberq daha əvvəl də bildirib ki, süni intellekt gələcəkdə böyük komandaların gördüyü işi tək bir yüksək ixtisaslı şəxsin yerinə yetirməsinə imkan verəcək. Bu layihə həmin yanaşmanın praktiki tətbiqi kimi qiymətləndirilir.
“Meta” daxilində artıq “MyClaw” və “Second Brain” kimi süni intellekt sistemləri istifadə olunur. Bu alətlər əməkdaşlara daxili məlumatlara çıxış, tapşırıqların idarə olunması və qərarvermə prosesində dəstək verir.
Şirkətin maliyyə direktoru Syuzan Li bildirib ki, süni intellekt tətbiqləri nəticəsində mühəndislərin məhsuldarlığı 30%-ə qədər artıb, bəzi istifadəçilərdə isə bu artım 80%-ə çatır.
“Meta” 2026-cı il üçün süni intellekt sahəsinə 115–135 milyard dollar sərmayə yatırmağı planlaşdırır, bu da şirkətin bu texnologiyaya ciddi şəkildə fokuslandığını göstərir.
Ekspertlər hesab edir ki, bu addım yalnız bir rəhbərin işini asanlaşdırmaq deyil, həm də gələcəkdə şirkət strukturlarının dəyişməsinə və idarəetmənin daha “yastı” (flattened) modelə keçməsinə səbəb ola bilər.
