Futbolla adı tez-tez çəkilməyən Vyetnam, Uzaq Şərqdə dünyada rekord səviyyəli bir idman infrastrukturu layihəsi ilə diqqət çəkir.
Vyetnamın paytaxtı Hanoyda salınmağı planlaşdırılan Trong Dong Stadium adlı yeni stadion, 135 000 nəfərlik tamaşaçı tutumu ilə hazırda dünyanın ən böyük stadionu hesab olunan Şimali Koreyadakı Rungrado 1 May stadionunun rekordunu əvəzləyəcək.
Bu super stadion yalnız idman tədbirləri üçün deyil, eyni zamanda geniş miqyaslı ictimai və mədəni tədbirlər üçün nəzərdə tutulub və layihə daxilində çoxfunksiyalı kompleks yaradılacaq. Layihə həmçinin Vyetnamın beynəlxalq səviyyədə böyük idman yarışlarına, o cümlədən FIFA Dünya Kuboku və Olimpiya Oyunlarına ev sahibliyi etməsi üçün infrastruktur potensialını gücləndirəcək.
Yeni stadionun konsept dizaynı Vyetnam mədəni irsinə işarə edən elementlərə malik olacaq və açılıb-bağlana bilən dam sistemi ilə ilin bütün mövsümlərində müxtəlif tədbirlərə ev sahibliyi etməyə imkan verəcək. Tikintinin 2028-ci ildə tamamlanması planlaşdırılır, ümumi idman və yaşayış kompleksinin isə 2035-ci ilə qədər bitirilməsi gözlənilir.
Layihənin miqyası və məqsədi Vyetnamı regionda idman və əyləncə sənayesi sahəsində yeni bir mərkəzə çevirməkdir. Tikinti işləri başladıqdan sonra bu stadion dünyanın ən böyük idman məkanlarından biri kimi beynəlxalq medianın və idman ictimaiyyətinin diqqətini çəkəcəyinə dair proqnozlar verilir.
