ABŞ rəsmiləri Yaxın Şərqdə İranla bağlı davam edən müharibənin yaxın həftələrdə sona çata biləcəyini bildiriblər. ABŞ-ın energetika naziri Kris Rayt Amerika telekanallarından birinə verdiyi müsahibədə qarşıdurmanın çox uzun çəkməyəcəyini düşündüyünü açıqlayıb.
Nazir qeyd edib ki, onun qiymətləndirməsinə görə, müharibə “bir neçə həftə ərzində, hətta daha tez də” başa çata bilər. Rayt əlavə edib ki, döyüşlər dayandıqdan sonra qlobal enerji bazarında sabitləşmə baş verəcək və neft təchizatının bərpası ilə qiymətlər aşağı düşə bilər.
ABŞ mediası bu açıqlamaları həm də bazarları sakitləşdirməyə yönəlmiş mesaj kimi qiymətləndirir. Müharibə fonunda enerji bazarlarında ciddi dalğalanmalar müşahidə olunur və Hörmüz boğazı ətrafında gərginlik neft qiymətlərinə birbaşa təsir göstərir.
Bununla yanaşı, ABŞ Prezidenti Donald Tramp daha əvvəl bildirib ki, İranın atəşkəsə hazır olduğu ehtimalı olsa da, Vaşinqton hazırkı şərtləri kifayət qədər əlverişli hesab etmir və daha yaxşı nəticə əldə etmək üçün hərbi əməliyyatların davam edə biləcəyini istisna etmir.
Hazırda ABŞ və İsrailin İranla qarşıdurması davam edir və regionda qarşılıqlı raket hücumları, hərbi əməliyyatlar və kəskin diplomatik gərginlik müşahidə olunur.
