UNO dinləri nədir? Rosvel hadisəsindən Raelizmə qədər uçan boşqab kultlarının yaranması

Hər şey 7 iyul 1947-ci ildə yaşanan bir hadisədən sonra başlandı. ABŞ-ın Nyu Meksiko əyalətində yerləşən Rosvel (Roswell) məntəqəsindəki bir fermada qəribə şeylər tapıldı; heç vaxt görülməyən bir sıra metal çubuqlar və başqa əşyalar… Bu əşyaları sökdükdə onlar yenidən əvvəlki görünüşünə qayıdırdı. Həmin materialların nə olduğunu anlaya bilməyən insanlar yerli təhlükəsizlik şefi ilə əlaqə saxladıqdan sonra, ABŞ ordusunun Hava Qüvvələri təmasa keçdi.

İstintaqı aparan mayor Cess Marsel (Jesse Marcel) bu parçaların dünyaya aid olmadığını, başqa aləmdən gəlmiş ola biləcəyini düşünən ilk insan idi. 24 İyun 1947-ci ildə Kennet Arnold adlı bir şəxs “səhvən” bir etiraf etdi: göl üzərində uçan dairələri gördüyünü söyləyən Arnold, beləcə, böyük bir əfsanənin – uçan boşqablar ideyasının müəllifinə çevrildi. Amerika ordusu o zaman sürətlə yayılan bu xəbəri əvvəl təsdiq etsə də, sonradan yalanlamağa məcbur oldu. Göydən düşən obyektin UNO deyil, meteor qalığı  olduğu bildirildi.

 Bu hadisədən sonra Rosvel qəsəbəsində yaşayanlar, məna verə bilmədikləri cisimləri tez-tez gördüklərini iddia etməyə  başladılar. Hadisə ilə əlaqədar şahid olduğunu söyləyən insanların sayı gündən-günə artarkən, bəzi qeyri-dəqiq informasiyalar da yayılmağa başlamışdı. İndiki vaxtda belə Rosvel hadisəsi, aktuallığını qoruyan və hələ də geniş araşdırmamış əfsanələrdən biridir.

Qayıdaq mövzumuza. UNO dinlərinin ortaq nöqtəsi yerdənkənar qüvvələrlə əlaqələrin olması, onlarla telepatik yollarla ünsiyyətin qurulması, planetimizin onların sayəsində daha xoşbəxt gələcəyə addımlayacağı, indiyədək mövcud olan dinlərin peyğəmbərlərinin əslində başqa aləmlərdən gəlmiş olması tezislərini özündə əks etdirir. Bəlkə də bütün bunların var olmasında “annunaki nəzərəiyyəsi”nin və ya “qədim astronavtlar” nəzəriyyəsinin də rolu var, lakin bu barədə dəqiq nəsə deyə bilmərik. Stiven Hantın “Alternativ Dinlər: Sosioloji Giriş” kitabında qeyd etdiyi kimi, “Ola bilsin ki, dindarlığın daha ortodoks forması ilə həmsərhəd olan kvazi-din forması uçan boşqab kultlarıdır”. Kristofer Hyu Partric (Christopher Hugh Partridge) “UFO Religions” kitabında yazır ki, J. Gordon Melton ilk UNO dinini Qay Ballard tərəfindən qurulan “I AM” Fəaliyyət qrupu olaraq qəbul edir.”Aetherius Cəmiyyəti”ni də ilk belə din kimi qəbul edənlər var. 

Bu gün XX əsrdə yayğın olan bəzi UNO dinləri barədə qısa məlumat verməyə çalışacağıq.

Aetherius Cəmiyyəti

Aetherius Cəmiyyəti 1950-ci illərin ortalarında Corc Kinq tərəfindən yaradılmış dini hərəkatdır. Kinqin iddia etdiyi kimi, “Kosmik Ustadlar” adlandırılan yerdənkənar qüvvələrlə təmaslar və əməkdaşlıq nəticəsində Yerdəki problemləri həll etmək və Yeni Əsra doğru irəliləmək mümkündür.

Aetherius, əsasən teosofiyaya əsaslanan və minillik, Yeni Əsr (New Age) və UNO din aspektlərini özündə birləşdirən sinkretik bir dindir. Dinin vurğularına altruizm, ictimai xidmət, təbiətə ibadət, mənəvi şəfa və fiziki məşqlər daxildir. Üzvləri kilsələr formasında yığıncaqlarda görüşürlər. Con A. Saliba bildirir ki, bir çox digər Yeni Əsr və ya UNO dinlərindən fərqli olaraq, “Aetherius Cəmiyyəti” əksər hallarda mübahisəsiz hesab edilir, baxmayaraq ki, onun ezoterik və minillik aspektləri bəzən ələ salınır. Cəmiyyətin üzvləri çoxmillətli olsa da, nisbətən azdır. David V. Barrett 2011-ci ildə dünya miqyasında üzvlərinin sayının minlərlə olduğunu və ən çox Birləşmiş Krallıq, ABŞ (xüsusilə Cənubi Kaliforniya) və Yeni Zelandiyada olduğunu qeyd edirdi.

“Aetherius Cəmiyyəti”nin təlimlərinə görə, tarix boyu müxtəlif din xadimləri – Budda, İsa və Lao Tzu kimi Kosmik Ustadlar bəşəriyyətə düzgün həyat tərzini öyrətmək üçün müxtəlif planetlərdən Yerə gəlmişlər. Məsələn, Krişna “Kosmik İerarxiya” və ya “Planetlərarası Şura”nın vətəni olan Saturndan, İsa və Budda isə Veneradandır. Buna görə də cəmiyyət bu dinlərin eyni mənbədən törədiyini və prinsiplərinin eyni olduğunu iddia edir. Bununla belə, bu varlıqlar başqa ölçüdə və ya müstəvidə olan ruhani varlıqlardır, çünki digər planetlərdə cismani ağıllı həyat ideyasının 1950-ci illərdə mümkün olmadığı bilinirdi. Cəmiyyətin inanclarına görə, həmçinin Vedik və hindu mətnlərində qeyd olunan vimanalar və UNO-lar tarix boyu bəşəriyyəti öyrətmək üçün Betlehem ulduzundan Yeri ziyarət ediblər.

İslam Milləti (Nation of İslam)

1930-cu ildə ABŞ-da Uolles Fard Məhəmməd tərəfindən qurulmuş dini və siyasi təşkilatdır. Qaradərili millətçi təşkilat olan “İslam Milləti” diqqətini Afrika diasporuna, xüsusən də, afro-amerikalılara yönəldirdi. O, əsas İslam ənənələrindən əhəmiyyətli dərəcədə fərqlənən bir İslam inancını tətbiq edirdi. Din alimləri bunu yeni dini cərəyan kimi səciyyələndirirdilər. O, mərkəzləşdirilmiş və iyerarxik təşkilat kimi fəaliyyət göstərirdi.

Dini cərəyanın inancına görə, ölümlü tanrılar var, bunların hər biri Allah adlı qaradərili tanrılardır. Onlardan ən sonuncusu Fard Məhəmməddir. İddia edilir ki, ilk Allah ən qədim insanları, ərəbdilli və qara dərili Şabazz qəbiləsini yaradıb, onun üzvləri daxili ilahiliyə malik idilər və bütün rəngli insanlar onların nəslindəndir. Yakub adlı bir adam isə ağ irqi yaradıb. Ağlar daxili ilahiliyə malik deyildilər və mahiyyət etibarilə zorakılıq edirdilər; onlar Şabazz qəbiləsini devirdilər və qlobal hökmranlığa nail oldular. ABŞ-da ağların üstünlük təşkil etdiyi cəmiyyətə qarşı çıxan “İslam Milləti” müstəqil Afro-Amerika dövlətinin yaradılması üçün kampaniya aparır və afro-amerikalıları iqtisadi cəhətdən özünü təmin edən və separatçı olmağa çağırır. Fərd Məhəmmədin tezliklə ağ irqi məhv etmək və utopiya qurmaq üçün “Ana Təyyarə” və ya “Ana Gəmi” adlı bir kosmik gəmi ilə qayıdacağı iddia edilir. Üzvlər məscid və ya məbəd adlanan binalarda ibadət edirlər. Təcrübəçilərdən ciddi geyim qaydalarına, xüsusi pəhriz tələblərinə və patriarxal gender rollarına riayət etməklə intizamlı həyat sürmələri gözlənilir.

Birləşmiş Nuvaub Milləti (Nuwaubian Nation)  

Həmçinin “Malachi Z” kimi tanınan Duayt York (Dwight York) tərəfindən qurulan dini hərəkatdır. York 1967-ci ildə Nyu-Yorkda bir neçə qaradərili müsəlman qrupları yaratmağa başladı. O, yəhudilik, xristianlıq, UNO dinləri, Yeni Əsr anlayışlarını özündə birləşdirərək öz təlimini formalaşdırdı. 1980-ci illərin sonunda o, Kemetizm və UNO dininin lehinə öz hərəkatının qara müsəlman teologiyasını tərk etdi.  1991-ci ildə o, öz icmasını Nyu-York, sonra isə Corciya ştatının Putnam qraflığının mərkəzi olan Eatonton yaxınlığında məskunlaşdırdı. Onun ardıcılları “Tama-Re” adlı qədim Misir temalı kompleks tikdilər və adlarını “Birləşmiş Nuvaub Mavr Milləti” olaraq dəyişdirdilər.

2000-ci ilə qədər cəmiyyətin təxminən 500 tərəfdarı vardı. York 2004-cü ilin aprelində çoxsaylı uşaq təcavüzü, reketlik və maliyyə pozuntularından təqsirli bilinərək, 135 il müddətinə azadlıqdan məhrum edildikdən sonra üzvlərin sayı kəskin şəkildə azaldı. Tama-Re kompleksi hökumətin müsadirəsi altında satıldı və söküldü.

“Nuwaubian”izmin inanc sistemi “Misirlilərə və onların piramidalarına ibadət, UNO-lara inanc, illuminati və bilderberqçilərlə əlaqəli müxtəlif konspirasiyalarla qaraların üstünlüyü ideyalarını üzə çıxarmaq” kimi təsvir edilir.

Raelizm (Raëlism)

1970-ci illərdə Fransada indi Rael kimi tanınan Klod Vorilhon tərəfindən qurulan UNO dinidir. Din alimləri Raelizmi yeni dini hərəkat kimi təsnif edirlər. Qrup Beynəlxalq Rael Hərəkatı (IRM) və ya Raelin rəhbərliyi altında iyerarxik təşkilat olan Rael Kilsəsi kimi rəsmiləşdirilib.

Raelizmə görə, Elohim kimi tanınan yadplanetli növü öz qabaqcıl texnologiyasından istifadə edərək bəşəriyyəti yaradıb. Lakin Elohimin tarixən tanrılarla səhv salındığını düşünürlər. İddia edilir ki, Elohim tarix boyu bəşəriyyəti öz mənşəyinə dair xəbərlərə hazırlayan peyğəmbərlər kimi xidmət etmiş 40 Elohim/insan hibridini yaratmışdır. Onların arasında Budda, İsa və Məhəmməd var və Rael özü 40-cı və son peyğəmbərdir. Raelistlər hesab edirlər ki, 1945-ci ildə Xirosimaya atom bombası atılmasından sonra bəşəriyyət özünü nüvə məhvi ilə hədələdiyi Apokalipsis Əsrinə qədəm qoyub. Raelizm hesab edir ki, bəşəriyyət dinc məqsədlər üçün yeni elmi və texnoloji inkişafdan istifadə etmək üçün bir yol tapmalıdır və buna nail olduqdan sonra Elohim öz texnologiyasını bəşəriyyətlə bölüşmək və utopiya qurmaq üçün Yerə qayıdacaq. Bu məqsədlə Raeliyalılar Elohimin kosmik gəmiləri üçün eniş meydançası olan səfirlik tikməyə çalışdılar. Raellər gündəlik meditasiya ilə məşğul olurlar, insan klonlaması vasitəsilə fiziki ölümsüzlüyə ümid edirlər və cinsi təcrübəyə güclü vurğu ilə liberal etik sistemi təbliğ edirlər.

Rael ilk dəfə 1974-cü ildə yazdığı “Le Livre Qui Dit La Verité” (Həqiqəti söyləyən Kitab) kitabında Elohim ilə əlaqə saxladığına dair iddialarını dərc etdi. Daha sonra o, ideyalarını təbliğ edən MADECH təşkilatını qurdu, 1976-cı ildə isə bu təşkilat dağıldı və yerini Rael Kilsəsi aldı. 1998-ci ildə Raël Mələklər Ordeni təsis edildi, üzvləri əsasən qadınlardan ibarət idi. 1997-ci ildə Rael, yüksək səviyyəli Raelian Bricit Buaselye (Brigitte Boisselier) tərəfindən idarə olunan, insan klonlanması ilə bağlı tədqiqatlarla məşğul olan “Clonaid” təşkilatını təsis etdi. 2002-ci ildə şirkət bir insan klonu – Həvva adlı körpə istehsal etdiyini iddia etdi və bu, mediadanın diqqətini çox cəlb etdi, həmçinin tənqidlərə tuş gəldi. Hərəkat qadınların və homoseksualların hüquqlarının müdafiəsi və nüvə sınaqlarına qarşı ictimai etirazları ilə daha çox diqqət çəkib.

Beynəlxalq Rael Hərəkatı, əksəriyyəti Qərbi Avropa və Şimali Amerikanın Frankofoniya bölgələrində və Şərqi Asiyanın bəzi hissələrində olmaqla, on minlərlə üzvünün olduğunu iddia edir.

Bunlardan başqa, UNO dinlərinə, ümumiyyətlə Yeni Əsr dinlərinə misal olaraq, haqqında bir əvvəlki məqaləmizdə bəhs etdiyimiz Sayentologiyanı, həmçinin “Günəş məbədi ordeni”, “Faun Qonq”, “Şeytan nazirliklərinin sevinci”, “Unarius” və s.-ni göstərə bilərik.